Գյումրիում տեղեկություններ են տարածվել, որ հուլիսի 24-ին սպանված հայտնաբերված Հարություն Գրիգորյանին՝ Մանկավարժական համալսարանի ռեկտորի եղբորը սպանել է սիրուհու ամուսինը, ՊՆ ռազմական ոստիկանության Շիրակի մարզի աշխատակից է։

NEWS.am-ի տեղեկություններով՝ այդ կապի մասին վաղուց հայտնի է եղել ամբողջ քաղաքին։

Շիրակի մարզի դատախազ Րաֆֆի Ասլանյանը NEWS.am-ի հետ զրույցում նշեց, որ կա կասկածվող անձանց որոշ շրջանակ, կատարվում են գործողություններ նրանց առնչությունը սպանությանը հիմնավորելու կամ հերքելու ուղղությամբ։

Ըստ ոստիկանության հաղորդագրության՝ 50-ամյա Հարություն Գրիգորյանի մարմինը հայտնաբերել են Գետք համայնքի տարածքում` անասնագոմերի հարևանությամբ կիսաքանդ շինության մեջ։ Արտաքին զննությամբ դիակի վրա հայտնաբերվել են բռնության հետքեր և հրազենային չորս վնասվածքներ` որովայնի, թիկունքի և ձեռքի հատվածներում:

Դեպքի վայրի զննությամբ հայտնաբերվել է 9 մմ տրամաչափի երկու գնդակ և հինգ կրակված պարկուճ:

Փաստի առթիվ հարուցվել է քրեական գործ ՀՀ քրեական օրենսգրքի 104 և 235 հոդվածների 1-ին մասի մասի հատկանիշներով: