ԱՄՆ-ում գործող հրեական կազմակերպությունը Թուրքիայի վարչապետ Ռեջեփ Թայիփ Էրդողանից պահանջել է հետ վերադարձնել 10 տարի առաջ ստացած պարգեւը՝ Գազայի հատվածում Իսրայելի իրականացրած ռազմական գործողության վերաբերյալ նրա վերջին գնահատականների պատճառով: Այս մասին գրում է «The Jerusalem Post»-ը:
Ամերիկայի հրեական կոնգրեսի նախագահ Ջեք Ռոզենը թուրք վարչապետին կոչել է «հավանաբար, աշխարհի ամենավտանգավոր հակաիսրայելական առաջնորդը» եւ մեղադրել, որ նա «վտանգավոր հռետորաբանության է դիմում քաղաքական նպատակներով եւ թուրքական բնակչությանը հրեա ժողովրդի դեմ բռնության է հրահրում»:
«Մենք ցանկանում ենք հետ ստանալ պարգեւը»,- Էրդողանին գրել է Ռոզենը՝ նշելով, որ վերջինի հայտարարությունները ոչ միայն «անուղղելի վնաս են հասցրել թուրք-հրեական հարաբերություններին եւ անմեղ մարդկանց վտանգի տակ դրել», այլեւ Անկարային զրկել են «Իսրայելի եւ ՀԱՄԱՍ-ի միջեւ ընթացող հակամարտությանը վերջ տալու նպատակով աշխատող օրինական միջնորդների սեղանի շուրջ տեղից»:
Նշենք, որ Իսրայելի ցամաքային զորքերի՝ Գազայի հատված մուտք գործելուց հետո Էրդողանը հանդես է գալիս Իսրայելի ամենասուր քննադատներից մեկի դերում՝ այն անվանելով ահաբեկչության պետություն եւ մեղադրելով պաղեստինցիների դեմ կանոնավոր կերպով ցեղասպանության իրականացնելու համար: Նա ասել է, որ Իսրայելը բարբարոսությամբ գերազանցել է Հիտլերին: