Բազմաթիվ մրցանակների դափնեկիր ռեժիսոր Ֆաթիհ Ակինի վերջին՝ «Սպի» անվանումով ֆիլմի պրեմիերան կայանալու է Վենետիկի 71-րդ միջազգային կինոփառատոնում, որն անցկացվելու է օգոստոսի 27-ից սեպտեմբերի 6-ը: Այս մասին գրում է «Asbarez»-ը:
Սցենարի հեղինակներն են Ֆաթիհ Ակինն ու Մարտիկ Մարտինը: Ֆիլմն անգլերեն է, տեւողությունը՝ 138 րոպե, չնայած Վենետիկում ներկայացվելիք տարբերակում այն կրկնօրինակվել է գերմաներեն:
«Սպի» ֆիլմը («The Cut») պատմում է Ցեղասպանությունը վերապրած հայազգի Նազարեթ Մանուկյանի մասին, ով տեղեկանում է, որ իր երկվորյակ դուստրերը կարող են ողջ լինել, եւ գնում է նրանց գտնելու: Նազարեթը Մարդին գյուղից ուղեւորվում է անապատ, այնուհետեւ Կուբա եւ, վերջապես, Հյուսիսային Դակոտա:
Համր Նազարեթի դերում հանդես է եկել Թահար Ռահիմը: Մյուս դերասաններից են Սիմոն Աբգարյանը, Արսինե Խանջյանը, Ակին Ղազին եւ Ջորջ Գեորգիուն: «Թահարն ամբողջ ֆիլմի ընթացքում ոչ մի խոսք չի ասում, եւ նա փոքր-ինչ Չարլի Չապլինին է հիշեցնում: Բայց, միաժամանակ, սա տիպիկ արեւմտյան կերպար է, Սերջիո Լեոնեի նման»,- նշել է ռեժիսորը:
