Եվրասիական միությանն անդամակցությունը վտանգավոր գայթակղություն է Հայաստանի համար: Այս մասին հուլիսի 25-ին լրագրողների հետ հանդիպման ժամանակ հայտարարեց Հայաստանի գինեգործների միության նախագահ Ավագ Հարությունյանը: Նրա խոսքով, Եվրասիական միության շուկան հնարավորություն է տալիս չափազանց մեծ ծավալներով գինի արտահանել՝ որակի այնքան էլ մեծ պահանջներ չդնելով, ինչպես եվրոպական շուկայի պարագայում:
Հարությունյանը որպես օրինակ նշեց Վրաստանը, որը մինչեւ 2006 թվականը՝ Ռուսաստանի կողմից գինու համար սահմանված էմբորգան, տարեկան շուրջ 60 մլն շիշ գինի էր արտահանում, որից 70%-ը՝ Ռուսաստան, այն դեպքում, երբ օբյեկտիվորեն չէր կարող 20 միլիոնից ավելի արտադրել: Հետեւաբար, լուրջ կասկածներ էին առաջանում մնացած 40 միլիոնի վերաբերյալ:
Երբ ռուսական շուկան փակվեց, Սահակաշվիլին գինեգործների առջեւ պայման դրեց. ավելի քիչ գինի արտադրել, սակայն հարյուր տոկոսանոց որակով: 5 տարվա ընթացքում բեկում տեղի ունեցավ: Ընդ որում, ըստ բանախոսի, արտադրության ծավալները կտրուկ հասան մինչեւ 15 մլն շիշ գինու (եվրոպական երկրներից վրացական գինին սկսեցին հիմնականում ներմուծել Լեհաստանն ու Լատվիան): Բայց այսօր, երբ Ռուսաստանի եւ Եվրամիության շուկան կրկին բաց է Վրաստանի համար, արտադրության պաշտոնական ծավալներն ավելացել են եւս 15 մլն շշով:
«Հնարավոր է՝ մեր գործընկերներն իսկապես առաջընթաց են արձանագրել եւ ավելի շատ գինի են արտադրում, բայց արդեն որակյալ: Հնարավոր է: Բայց նախկին փորձը հիշում ենք: Այդ պատճառով, այսպես թե այնպես, ավելի լավ է արտադրել թեկուզ փոքր-ինչ թանկ եւ քիչ, բայց՝ որակյալ: Այդ դեպքում ավելի քիչ կախված կլինենք քաղաքականությունից: Իսկ Եվրասիական միության շուկան հակառակն է խթանում: Եվ ոչ բոլոր արտադրողները կդիմադրեն այդ գայթակղությանը»,- ասաց Հարությունյանը:
Ներկայում, ըստ նրա, Հայաստանից 90%-ով արտահանում է ոչ թանկ, 3-4 տարեկան կոնյակ՝ մեկ շշի համար սկսած 3.5 դոլարից: Սակայն նույն Ռուսաստանում էժան կատեգորիայում հայկական գինին չի կարող մրցակցել, ասենք, մոլդովական գինու հետ: Այդ պատճառով այդ երկիր ուղարկվում է թանկ եւ որակյալ հայկական գինի, մեկ շիշը՝ 600-700 ռուբլի:
Նշենք, որ մաքսային տվյալների համաձայն, 2013 թվականին Հայաստանից գինու արտահանման ծավալները կազմել են 4.26 մլն դոլար: Ընդ որում, շուրջ 80%-ն արտահանվել է Ռուսաստան: