«Levitt Pavilion Pasadena» կազմակերպությունը Հայոց ցեղասպանության զոհերի հիշատակի հանձնաժողովի հետ համատեղ կալիֆորնիական Փասադենա քաղաքում օգոստոսի 7-ին կազմակերպելու է համերգ՝ «Echocell» երաժշտական կոլեկտիվի մասնակցությամբ: Փասադենայի Հիշատակի զբոսայգում նախանշված համերգի նպատակն է՝ բարձրացնել Հայոց ցեղասպանության եւ զբոսայգում տեղադրվելիք Ցեղասպանության զոհերի հուշարձանի վերաբերյալ բնակչության տեղեկացվածությունը:
Ըստ «Asbarez» պարբերականի, համերգի ընթացքում Հայոց ցեղասպանության զոհերի հիշատակի հանձնաժողովի ներկայացուցիչներն ու «Levitt Pavilion Pasadena» կազմակերպության անդամները լսարանին ներկայացնելու են նախագծի մանրամասները: Հուշարձանի մասին տեղեկություններ են տրամադրելու սոցիալական վրանում, որտեղ նաեւ դրամահավաք է անցկացվելու, քանի որ նախագիծն իրականացվում է մասնավոր ֆինանսավորմամբ:
Նշենք, որ Փասադենայի հայ համայնքի ղեկավարները 2013 թվականին Հայոց ցեղասպանության զոհերի հիշատակի հանձնաժողով ստեղծեցին՝ քաղաքի Հիշատակի զբոսայգում հուշարձան կառուցելու նպատակով: Այն բացվելու է 2015 թվականին, Հայոց ցեղասպանության 100-րդ տարելիցին ընդառաջ: