Արցախում 2008թ. կայացած «Մեծ հարսանիքի» մասնակից զույգերն այդ կապակցությամբ դիմել են ՌԴ պատկան մարմիններին՝ պահանջելով ազատ արձակել հայտնի գործարար Լեւոն Հայրապետյանին: Այդ մասին հայտնում է «Արցախպրես»-ը:
Հանրագրում ասվում է.
Մենք՝ 2008թ. Լեւոն Հայրապետյանի նախաձեռնած «Մեծ հարսանիքի» 674 զույգերս, անգնահատելի ենք համարում արցախցի մեծ բարերարի ներդրումն Արցախի զարգացման գործում՝ թե՛ մեզ ու մեր զավակներին հովանավորելու, թե՛ բազմաթիվ այլ խոշոր ծրագրերի տեսքով:
«Մեծ հարսանիք» ծրագրի շրջանակներում Արցախում կազմավորվել է 674 ընտանիք, եւ համարյա 6 տարվա ընթացքում գրանցվել է շուրջ 1200 ծնունդ: Քաջ իմանալով Լեւոն Հայրապետյանի դավանած մարդկային բարձր արժեքների մասին՝ մենք համոզված ենք, որ նրան ուղղված մեղադրանքներն անհիմն են: Հույս ունենք, որ ՌԴ իրավապահ մարմինները կցուցաբերեն օբյեկտիվ մոտեցում, եւ արդյունքում կապացուցվի մեծ բարերարի անմեղությունը:
Հետաքննության ընթացքն ու ճշմարտության վերհանումը համարելով ժամանակի հարց՝ այս փուլում նախաքննության մարմնից պահանջում ենք Լեւոն Հայրապետյանին անհապաղ ազատ արձակել կալանքից: Բացի ազատության մեջ նախաքննությանը մեծապես աջակցելուց, նա այդ դեպքում հնարավորություն կստանա բարելավել իր առողջական վիճակը, որն ամենից շատ է անհանգստացնում մեզ»:
