Հիմա, երբ բազմաթիվ չլուծված հարցեր գոյություն ունեն երկրում, վարչապետի 100 օրը որպես այդպիսին չի կարող հստակ մեզ ցույց տալ, թե նոր կառավարությունն ինչ գործառույթների վրա է սեւեռել իր ուշադրությունը եւ դրանք որքանով հնարավոր է կատարել: Այս մասին NEWS.am-ի թղթակցի հետ զրույցում նշեց ԲՀԿ անդամ, տնտեսագետ Վարդան Բոստանջյանը:
Դիտարկմանը, թե դուք մեծ ակնկալիքներ ունեիք նոր վարչապետից, արդյոք դրանք արդարացել են, Բոստանջյանը պատասխանեց. «Բնականաբար, այն գնահատականը, որ ես տվել էին նոր վարչապետին, չի փոխվել: Նոր վարչապետը լինելով էներգիայով լեցուն մարդ, ցանկացած աշխատանքից վախ չունի, փոխարենը ունի համաձակություն ձեռնամուխ լինի ամենաբարդ աշխատանքներին: Այս 100 օրերի ընթացքում իր առաջին առնչությունը հասարակության հետ ցույց է տվել, որ վարչապետը վեր է հանում կնճռոտ հարցեր, բարձրաձայնում է եւ , հասկանալի է, որ հետո այդ հարցերի լուծումները հենց նրանից են պահանջելու: Դա հույս է ներշնչում, որ կառավարությունն իր քայլերով, հնարավոր է, երկրին բերի նոր ցանկալի վիճակի»:
Բոստանջյանը կարծիք հայտնեց, որ կառավարության ու վարչապետի աշխատանքին առավել ամբողջական գնահատական տալու համար պետք է սպասենք լավագույն դեպքում մինչեւ հոկտեմբեր, կամ տարվա վերջ, որ կարողանանք հասկանալ, այդուհանդերձ ստացվում է մեզ մոտ ճեղքում իրականացնել, թե ոչ:
Հիշեցմանը, որ վարչապետ Հովիկ Աբրահամյանը կուտակային կենսաթոշակների համակարգի վերաբերյալ խոստումներ տվեց, սակայն օրենքի բովանդակությունը, խոշոր հաշվով չփոխվեց, տնտեսահետն արձագանքեց. «Կուտակայինը շատ կարեւոր է, բայց միեւնույն ժամանակ դա պետք է դա պետք է դիտարկել բոլոր խնդիրների ամբողջության մեջ: Ես կարծում եմ, որ Հայաստանի գանձարանում ֆինանսական միջոցների խրոնիկական դեֆիցիտ գոյություն ունի, եւ կուտակայինի խնդիրները, իմ կարծիքով, այդ դեֆիցիտի խնդիրն են լուծում: Այսինքն ի դեմս պարտադիր մուտքերի գանձապետարանը գոնե պիտի ունենա բավարար ֆինանսական ռեսուրսներ: Ցավոք, մենք հիմա ունենք բյուջեի ֆինասնական միջոցների անբավարարություն»: