Ադրբեջանական կողմը հուլիսի 25-ին մի քանի ժամ կրակի տակ է պահել Տավուշի մարզի սահմանամերձ Մովսես, Ներքին Կարմիրաղբյուր եւ Այգեպար գյուղերը, բարեբախտաբար հայկական կողմը կորուստներ չունի: Այս մասին այսօր՝ հուլիսի 26-ին, Ծիծեռնակաբերդում լրագրողների հետ զրույցում ասել է պաշտպանության նախարարի մամուլի քարտուղար Արծրուն Հովհաննիսյանը:
«Միշտ էլ ասենք, որ հրադադարի ռեժիմը խախտում են, կորուստներ են կրում, թող մտածեն այդ պատասխանատվության մասին: Չպետք է հրադադարի ռեժիմը խախտել, մի քանի օր է՝ ինչ հանգիստ էր, նորմալ էր: Թող չխախտեին, ակնհայտ է, որ իրենք խախտել են եւ պատասխան են ստացել: Երբ անկանոն է լինում, մենք չենք պատասխանում, սակայն սաստիկ լինելու դեպքում մենք սկսում ենք պատասխանել»,- ասաց նա՝ նշելով, որ տեղյակ չէ՝ հակառակորդը կորուստներ ունի, թե ոչ:
Լրագրողների դիտարկմանը, թե բանկիչների խոսքով հայկական կողմը ավելի արագ պետք է պատասխաներ, Արծրուն Հովհաննիսյանը պատասխանեց. «Դա բնակչի էմոցիոնալ մոտեցումն է, եթե մենք անհրաժեշտություն համարենք այդպես անել, կանենք բայց ի վերջո կան ռազմական չափորոշիչներ, մոտեցումներ, որոնց պետք է հետեւել»: