Ադրբեջանական դիվերսիայի հետեւանքով հուլիսի 26-ի գիշերը Լեռնային Ղարաբաղի Մարտակերտի շրջանի պաշտպանական դիրքերից մեկում զոհված 19-ամյա Խաչատուր Բադասյանը Տավուշի մարզի Հաղթանակ գյուղից էր:
Ինչպես NEWS.am-ին հայտնեց Տավուշի մարզի Հաղթանակ համայնքի ղեկավար Վահրամ Շառոյանը, Խաչատուրը 1.5 տարվա զինծառայող էր:
«Խիստ անապահով ընտանիք են, տուն չունեն: Խաչատուրին մի քույրիկ ունի, որն այս տարի է ավարտել դպրոցը»,- ասաց գյուղապետը:
Նրա խոսքով՝ ամբողջ գյուղն է սգում 19-ամյա զինվորի մահը: Այս պահին Խաչատուր Բադասյանի դին տեղափոխում են Երեւան, որից հետո արդեն վաղը կեսօրին՝ Տավուշ:
Ավելի վաղ ԼՂՀ ՊՆ հայտնել էր, որ հուլիսի 26-ին, հակառակորդը ղարաբաղա-ադրբեջանական հակամարտ զորքերի շփման գծի հյուսիսային եւ հյուսիս-արեւելյան ուղություններով ձեռնարկել է դիվերսիոն հետախուզական ներթափանցման փորձեր:
ԼՂՀ ՊՆ մամուլի ծառայությունից հայտնում են, թե ՊԲ առաջապահ զորամասերի կողմից ձեռնարկված օպերատիվ գործողությունների արդյունքում վերջիններս ժամանակին հայտնաբերվել եւ, կորուստներ կրելով ու թողնելով մեծաքանակ տեխնիկական միջոցներ եւ սպառազինություն, հետ են շպրտվել ելման դիրքեր: Ցավոք գործողությունների արդյունքում հրազենային մահացու վիրավորում է ստացել զինծառայող, 1994թ. ծնված Խաչատուր Լեւոնի Բադասյանը:
Լուսանկարը՝ Արսեն Սարգսյանի/NEWS.am