Ադրբեջանական դիվերսիայի հետեւանքով հուլիսի 26-ին վիրավորված ժամկետային զինծառայող, ագարակցի Գրիգոր Գրիգորյանի վիճակը ծանր է, վնասվել են թոքը, ստոծանին եւ լյարդը: Այս մասին NEWS.am-ին ասաց Սյունիքի մարզի Ագարակի քաղաքապետ Մխիթար Զաքարյանը:
«Քիչ առաջ ենք խոսել Ստեփանակերտի հոսպիտալի պետի հետ, ասաց, որ թոքն է ծակվել, ստոծանին ու լյարդն են վնասվել: Վիճակը ծանր կայուն է, բժիշկները պայքարում են նրա կյանքի համար: Ծնողներն էլ արդեն ճանապարհին են: Մտածում էինք, որ Երեւան կբերեն, բայց վիճակն էնքան ծանր է, որ վախենում են տեղափոխեն»,- ասաց քաղաքապետը:
Նրա խոսքով՝ Գրիգոր Գրիգորյանը տան փոքր զավակն է, իրենից մեծ քույր եւ եղբայր ունի, ծնողներն էլ աշխատում են Պղնձամոլիբդենային գործարանում:
Ավելի վաղ NEWS.am-ը հայտնել էր, որ Ծիծեռնակաբերդում ռազմական բուհերի լեյտենանտներին սպայական վկայականների հանձնման արարողության ժամանակ պաշտպանության նախարար Սեյրան Օհանյանը հայտարարել էր, որ հուլիսի 25-ի լույս 26-ի գիշերը Հայաստանի հյուսիս-արեւելյան սահմաններում եւ Արցախի Հանրապետության շփման գծում մի քանի ուղղություններով հակառակորդի կողմից ձեռնարկված դիվերսիոն -հետախուզական գործողությունները կանխելիս հայկական կողմից մեկ զինծառայող է զոհվել, երկուսը՝ վիրավորվել։