Վրաստանում Հայաստանի դեսպան, սպորտի եւ երիտասարդության հարցերի նախկին նախարար Յուրի Վարդանյանի որդու՝ ապօրինի թմրամիջոց ձեռք բերելու եւ իրացնելու համար մեղադրվող Դավիթ Վարդանյանի գործով առաջիկա նիստին՝ օգոստոսի 13-ին, մեղադրական ճառով հանդես կգա դատախազը, որից հետո էլ հնարավոր է լինի պաշտպանական ճառն ու հրապարակվի դատավճիռը: Այս մասին NEWS.am-ին ասաց Դավիթ Վարդանյանի փաստաբան Վահան Հայրապետյանը:
«Մենք պնդում ենք, որ ավելորդ մեղադրանք է առաջադրվել Դավիթ Վարդանյանին. նա մաքսանենգությամբ չի զբաղվել: Իմ պաշտպանյալը թմրանյութը ձեռք է բերել Ագարակ գյուղում իր անձնական օգտագործման համար: Նույնիսկ ապացույց չկա, որ այլ երկրում է Դավիթը ձեռք բերել թմրանյութը: Այն փաստը, որ իմ միջնորդությունը՝ մաքսավորներին դատարան կանչելու վերաբերյալ, խոսում է հենց այն մասին, որ մաքսավորները գալու էին եւ ասեին, որ նման բան չի եղել: Թե ինչ որոշում կկայացնի դատարանը, չեմ ուզում կանխատեսումներ անել: Սպասենք օգոստոսի 13-ի դատին»,- ասաց փաստաբանը:
Նրա խոսքով՝ միայն դատավճռից հետո կարելի է խոսել դատարանի կողմնակալ լինել-չլինելու մասին: Հարցին՝ հնարավոր է վերջին դատին նաեւ Դավիթ Վարդանյանի հարազատները ներկա լինեն, Վահան Հայրապետյանը պատասխանեց. «Յուրի Վարդանյանը մի քանի անգամ ասել է, որ չի խառնվելու, իսկ ընտանիքն էլ դատերին ներկա չի լինում տարբեր պատճառներով: Ամեն դեպքում, տեսակցությունները կալանավայր արգելված չեն. մայրը հաճախ է որդուն այցելում»:
Հիշեցնենք, որ Յուրի Վարդանյանի որդու՝ Դավիթ Վարդանյանի նկատմամբ 2013թ. հոկտեմբերի 15-ին քրեական գործ է հարուցվել Իրանից առանց իրացնելու նպատակով թմրանյութ ձեռք բերելու եւ մաքսանենգ ճանապարհով Հայաստան տեղափոխելու փորձի համար։ Նա կալանավորվել էր եւ տեղափոխվել «Երեւան կենտրոն» ՔԿՀ:
