Ինքնահռչակ «Դոնեցկի ժողովրդական հանրապետության» ներկայացուցիչները հայտնել են, որ Շախտյորսկ եւ Տորեզ քաղաքների արվարձաններում շարունակվող մարտերի արդյունքում ռուսամետ ակտիվիստները կորցրել են վերահսկողությունը Ռասսիպնոյե գյուղում, որտեղ գտնվում են մալայզիական Boeing 777 օդանավի բեկորների մի մասը:
Ավելի վաղ այդ շրջանում մարտերի հետեւանքով միջազգային փորձագետների պատվիրակությունը երկու անգամ չէր կարողացել մոտենալ օդանավի կործանման վայրին եւ սկսել իր աշխատանքները:
Նախորդ շաբաթ Նիդերլանդների իշխանությունները հայտարարել են Ուկրաինայի արեւելք մոտ 40 ոստիկաններ ուղարկելու իրենց մտադրության մասին՝ «Բոինգի» բեկորների ընկնելու վայրում քննչական գործողություններ իրականացնելու եւ աղետի մնացած զոհերին որոնելու նպատակով:
Սակայն, ինչպես հայտարարել է ԵԱՀԿ առաքելության աշխատակից Ալեքսանդր Հուգը, աղետի վայր հասնելու ճանապարհը բավարար չափով անվտանգ չէ:
