Գյումրիում հուլիսի 24-ին տեղի ունեցած երկու սպանություններն էլ արագ բացահայտվել են ոստիկանության տարած բացատրական աշխատանքների եւ օպերատիվ գործողությունների շնորհիվ: Այս մասին ասաց արձակուրդի մեջ գտնվող Շիրակի մարզի ոստիկանապետ Վարդան Նադարյանը՝ նշելով, որ կատարված երկու դեպքերը չեն խոսում Գյումրի կրիմինալ համբավ ունենալու մասին:
«Եթե մորաքրոջ, հորաքրոջ տղաներով նստում, հարբում են ու հիշում են անցած իրենց փոխհարաբերություններն ու իրար սպանում են, դա կրիմինալ վիճակի մասին է խոսո՞ւմ: Սպանության երկու դեպքն էլ բացահայտված է. Հարություն Գրիգորյանի սպանությունը կատարած անձը մեր բացատրական աշխատանքների շնորհիվ եկել, ներկայացել է, զենքն առգրավված է»,-ասաց նա:
Շիրակի ոստիկանապետը չցանկացավ խոսել Գյումրիի Մանկավարժական համալսարանի ռեկտոր Վարդեւան Գրիգորյանի եղբորը՝ Հարություն Գրիգորյանի, սպանության դրդապատճառների մասին՝ ասելով, որ դրանք նախաքննության ընթացքում կբացահայտվեն եւ ինքն այժմ անպատասխանատու հայտարարություններ չի ուզում անել:
Ամեն դեպքում, Վարդան Նադարյանն ընդգծեց, որ Շիրակի ոստիկանությունը շատ արագ բացահայտեց սպանության 2 դեպքերն էլ:
Ավելի վաղ NEWS.am-ը հայտնել էր, որ հուլիսի 24-ին ժամը 16:00-ի սահմանում Գետք համայնքի չօգտագործվող ֆերմաներից մեկի տարածքում գտել են Գյումրիի պետական Մանկավարժական ինստիտուտի ռեկտոր Վարդեւան Գրիգորյանի եղբոր՝ Հարություն Գրիգորյանի դին՝ հրազենային վնասվածքով։ Նույն օրը Գյումրիի Աթարբեկյան փողոցում ծեծկռտուքի ժամանակ դանակահարվել էր 36-ամյա Էդգար Անտիկյանը, որն էլ ժամեր անց հիվանդանոցում մահացել էր:
