Արեւմտյան պետությունների մի շարք առաջնորդներ հայտարարել են Ռուսաստանի դեմ նոր պատժամիջոցների անհրաժեշտության մասին: Ֆրանսիական Les Echos-ն, հղում կատարելով Ելիսեյան պալատի մամուլի ծառայությանը, գրում է, որ այս մասին հայտարարվել է Ֆրանսիայի նախագահ Ֆրանսուա Օլանդի եւ ԱՄՆ նախագահ Բարաք Օբամայի, Մեծ Բրիտանիայի վարչապետ Դեւիդ Քեմերոնի, Գերմանիայի կանցլեր Անգելա Մերկելի եւ Իտալիայի վարչապետ Մաթեո Ռենցիի զրույցի ընթացքում: Կողմերը քննարկել են Ուկրաինայում եւ Գազայի հատվածում տիրող իրավիճակը:
Արեւմտյան երկրների ղեկավարների կարծիքով, չնայած ՌԴ նախագահ Վլադիմիր Պուտինին ուղղված մի շարք դիմումներին՝ Ռուսաստանը, ցավոք, «փաստացի ճնշում չի գործադրել անջատականների վրա, որպեսզի նրանց երկխոսության հրավիրի եւ համատեղ միջոցներ չի ձեռնարկել ռուս-ուկրաինական սահմանի վերահսկողության հարցում»: Նման իրավիճակում արեւմտյան պետությունները ղեկավարներն անհրաժեշտ են համարել Ռուսաստանի դեմ նոր գործողությունների ձեռնարկումը եւ հույս են հայտնել, որ Մոսկվան կառուցողական դիրքորոշում կցուցաբերի:
