Տավուշի մարզի սահմանամերձ գյուղերում այսօր՝ հուլիսի 29-ի առավոտյան ժամը 10:00-ի դրությամբ հանգիստ է, իսկ գիշերվա կրակոցները եղել են անհավանական. բարեբախտաբար վիրավորներ չկան:
Ինչպես NEWS.am-ին հայտնեց Մովսեսի գյուղապետ Արարատ Ավալյանը, հակառակորդը դեռ այսպիսի ուժգնությումբ երբեք չէր կրակել:
«Բարեբախտաբար, մարդկային զոհեր չկան, միայն նյութական վնասներ ենք կրել. ավտոտնակների դարպասներ, պատուհաններ են վնասվել: Բայց մեզ ուշադրություն ու աջակցություն է հարկավոր ոչ թե իշխանությունների կամ կառավարության, այլ հասարակ մարդկանց. միլիարդատերերը, որ Երեւանում հանգիստ նստած են, մեր շնորհիվ են հանգիստ, բայց չեն գնահատում ու ոչ մի կերպ չեն ցանկանում օգնել: Երեւանում Կարապի լճի մոտ Վարդավառ են նշում, իրար ջրում, իսկ Մովսեսում մարդիկ հրացանի գնդակների տակ են ջրոցի խաղում»,- ասաց գյուղապետը:
Նրա խոսքով՝ երեկ երեկոյան ժամը 21:00-ից սկսած ադրբեջանական կողմը նախ կրակ է բացել դիրքերի ուղղությամբ, ապա հատուկ հրթիռի օգնությամբ լուսավորել սահմանամերձ գյուղերն ու սկսել կրակել:
«Միայն հայկական կողմի պատասխան հարվածից հետո են լռել ադրբեջանցիները: Օր օրի ավելի է ուժեղանում թշնամու կրակոցները»,- ավելացրեց Արարատ Ավալյանը:
Նշենք, որ ադրբեջանական կողմը կրակ էր բացել սահմանամերձ Մովսես, Չինարի, Այգեպար, Ներքին Կարմիրաղբյուր գյուղերի ուղղությամբ: Պաշտպանության նախարարի մամուլի խոսնակ Արծրուն Հովհաննիսյանը NEWS.am-ին, սակայն ասել էր, որ «ահարկու» չէին այդ կրակոցները: