«Air France» ավիաընկերության հուլիսի 26-ին Փարիզ-Երեւան չվերթն իրականացնող օդանավը թռիչքուղուց 1000 մետր հեռու է եղել, հետեւաբար, տեղեկությունները, թե վայրէջքի ժամանակ օդանավը թեքվել է ձախ կողմի վրա, հպվել թռիչքուղուն, չեն համապատասխանում իրականությանը: Այս մասին NEWS.am-ին ասաց Քաղավիացիայի վարչության մամուլի քարտուղար Նելլի Չերչինյանը:
«Եղանակն անբարենպաստ է եղել եւ անձնակազմը որոշել է երկրորդ պտույտը կատարել: Արտառոց ոչինչ չի եղել, իսկ տեղեկությունները, թե ձախ կողմի վրա է թեքվել, հրաշքով է փրկվել վթարից, իրականությանը չեն համապատասխանում, ուղեւորները պարզապես վախի զգացում են ունեցել, իրենց թվացել է, թե մոտ են գտնվում թռիչքուղուն: Իրականում, օդանավը 1000 մետր հեռու է եղել»,- ասաց Նելլի Չերչինյանը:
Ավելի վաղ NEWS.am-ը հայտնել էր, որ Երեւանի օդանավակայանում վայրէջքի ժամանակ «Air France» ավիաընկերությանը պատկանող օդանավը թեքվել է ձախ կողմի վրա, հպվել թռիչքուղուն, սակայն օդաչուներին չի հաջողվել վայրէջք կատարել. նրանք որոշել են երկրորդ շրջան դուրս գալ ու կտրուկ արագություն են հավաքել: Օդանավը եւս 40 րոպե պտտվել է օդանավակայանի վրայով, իսկ ինքնաթիռն ուժեղ ցնցվել է: Ականատեսի խոսքով՝ «վայրէջքի ժամանակ տպավորություն էր, թե ինքնաթիռը լողում է եւ չի կարող հպվել թռիչքուղուն»: Բարեբախտաբար, օդաչուներին հաջողվել է վայրէջք կատարել՝ մոտ մեկ ժամ ուշացումով: