Արցախի Քաշաթաղի շրջանում հուլիսի 22-ի վաղ առավոտյան ականի պայթյունի հետեւանքով վիրավորված Արթուր Բաղդասարյանին արդեն տեղափոխել են հիվանդասենյակ, իսկ Գառնիկ Ավետիսյանը դեռ գտնվում է վերակենդանացման բաժանմունքում: Այս մասին NEWS.am-ին ասաց «Էրեբունի» բժշկական կենտրոնի վերակենդանացման բաժնի վարիչ Արմեն Մուրադյանը:
«Արթուր Բաղդասարյանի վիճակը կայուն է, հիվանդասենյակում է, իսկ Գառնիկ Ավետիսյանինը ծանր է, սակայն կայուն: Նա թոքաբորբ ունի, սպասում ենք՝ վիճակը բարելավվի, որ ողնաշարի վիրահատություն կատարենք»,- ասաց նա:
Նշենք, որ Գառնիկ Ավետիսյանը ողնաշարի կոտրվածք ունի, իսկ Արթուր Բաղդասարյանը՝ կրծոսկրի, անրակի կոտրվածք, թոքերի վնասվածք: Նրանց հետ դեպքի օրը վիրավորվել է նաեւ Արմավիրի քաղաքապետ Ռուբեն Խլղաթյանը, որն ունի գլխուղեղի սալջարդ, արյունազեղում եւ 5-րդ մատի կոտրվածք: Վերջինիս հիվանդասենյակ են տեղափոխել հուլիսի 23-ին:
Հիշեցնենք, որ դեպքը ըստ Արտակարգ իրավիճակների նախարարության տեղի է ունեցել հուլիսի 22-ին առավոտյան ժամը 06.30-ին սահմաններում ԼՂՀ-ի Քաշաթաղի շրջանի Վաղազին գյուղում. «Տոյոտա պրադո» մակնիշի 71OM100 պետհամարանիշի ավտոմեքենան պայթել է ականապատ տարածքում, ինչից Արմավիրի քաղաքապետի վարորդ Արման Խլղաթյանը տեղում մահացել է, իսկ ուղևորներ Ռուբեն Խլղաթյանը, Գառնիկ Ալեքսանյանը եւ Արթուր Բաղդասարյանը հոսպիտալացվել են բժշկական կենտրոն, այնուհետեւ ուղղաթիռով տեղափոխվել Երևանի «Էրեբունի» բժշկական կենտրոն:
