Հռոմի եւ Վենետիկի իշխանությունները հայտարարել են զբոսաշրջային հարկը ավելացնելու մասին: Այն վերցնում են Իտալիայի այս քաղաքների յուրաքանչյուր այցելուից: Վենետիկը տեսնել ցանկացողներից հարկվող գումարի չափն այս տարվա սեպտեմբերից կավելանա 50 եվրոցենտով: Ներկայում հարկը կազմում է 3 եվրո՝ «երեք աստղանի» հյուրանոցի, եւ 4 եվրո՝ «չորս աստղանի» հյուրանոցի համար:
Հռոմի այցելուները ստիպված կլինեն վճարել շուրջ 2 անգամ ավելի: Ըստ ИТАР-ТАСС-ի, մայրաքաղաքի բարձր կարգի հյուրանոցներում իջեւանողներն օրական լրացուցիչ 7 եվրո են վճարելու: 6 եվրո վճարելու են «չորս աստղանի» հյուրանոցում, 4 եվրո՝ «երեք աստղանի» հյուրանոցում իջեւանողները:
Հռոմի հյուրանոցային բիզնեսի ներկայացուցիչները հայտարարել են, որ մտադիր են արշավ սկսել զբոսաշրջային հարկի չափը բարձրացնելու դեմ: Հռոմի շատ հյուրանոցներ հիմա ստիպված են զեղչեր տրամադրել հաճախորդներին՝ առաջարկելով «զբոսաշրջային հարկը ներառող գին»: