ԱՄՆ իշխանությունները փոստով կասկածելի սպիտակ փոշով ծրարներ ուղարկելու կասկածանքով ձերբակալել են Թեխաս նահանգի Ռոուլեթ քաղաքի բնակիչ Հոն Մին Թրուոնգին: Հետաքննության տվյալներով, 2008 թվականից տղամարդն ավելի քան 500 նման ծրարներ է ուղարկել դպրոցներ, կոմերցիոն ընկերությունների եւ պետական հաստատությունների, ինչպես նաեւ ամբողջ աշխարհում ԱՄՆ դեսպանատներ:
Մասնավորապես, 66-ամյա Թրուոնգը մի քանի նամակ է ուղարկել Թեխասի Գրանդ Փրեյրի քաղաքում գտնվող Lockheed Martin տիեզերական կորպորացիա: Իսկ 2013 թվականի հունիսին նամակներ են ստացել Բոստոնի միանգամից 28 դպրոցներ: Որոշ նամակներ սկսվել են «Ալ Քաիդա»-ն վերադարձել է» բառերով:
CNN-ի փոխանցմամբ, մի շարք նամակներ էլ հասցեագրված են եղել ԱՄՆ նախագահ Բարաք Օբամային եւ ամերիկյան Կոնգրեսի անդամներին:
Նամակներից ոչ մեկում թունավոր նյութեր չեն հայտնաբերվել: Սակայն դրանք ստանալուց հետո խուճապ է առաջացել, բացի այդ, ստիպված են եղել դեպքի վայր ժամանել ոստիկանության եւ բժշկական ծառայությունների աշխատակիցները:
Այս գործի հետաքննությանը մասնակցել է ՀԴԲ-ն: Ըստ ИТАР-ТАСС-ի, դատական հաջորդ նիստը նշանակված է օգոստոսի 4-ին: Մինչ այդ, Թրուոնգը կալանքի տակ է մնալու: