Անկասած, ԱՄՆ հեշտությամբ կշարունակի աշխատել Տիգրան Սարգսյանի հետ ԱՄՆ-ում ՀՀ դեսպանի նրա նոր պաշտոնում: Այդ մասին այսօր՝ հուլիսի 29-ին, լրագրողներին հայտարարեց Հայաստանում ԱՄՆ դեսպան Ջոն Հեֆերնը:
Հարցին՝ արդյոք Տիգրան Սարգսյանի թեկնածությունը ԱՄՆ-ի համար ամենաընդունելի՞ն էր՝ հաշվի առնելով այժմ արդեն նախկին վարչապետի օֆշորային սկանդալի հայտնվելը, Հեֆերնը նկատեց, որ յուրաքանչյուր երկիր ինքն է որոշում ՝ ով կներկայացնի իրեն արտերկրում: «Մենք շատ տարիներ ենք աշխատել պարոն Սարգսյանի հետ վարչապետի պաշտոնում, եւ իհարկե, կշարունակենք աշխատել նրա հետ՝ որպես ԱՄՆ-ում Հայաստանի դեսպան», - հավելել է նա:
Հիշեցնենք, որ Տիգրան Սարգսյանը ԱՄՆ-ում Հայաստանի դեսպան է նշանակվել 6 տարի շարունակ ՀՀ վարչապետի պաշտոնը զբաղեցնելուց հետո: Հուլիսի 15-ին Սարգսյանը ԱՄՆ նախագահ Բարաք Օբամային հավատարմագիր է հանձնել:
