Հայաստանում ԱՄՆ դեսպան Ջոն Հեֆերնը մինչեւ հանրապետությունը լքելը շատ անելիքներ ունի: Այդ մասին այսօր՝ հուլիսի 29-ին, լրագրողներին հայտարարեց Հայաստանում ԱՄՆ դեսպան Ջոն Հեֆերնը:
«Ես դեռ անելիքներ ունեմ, ես այդքան արագ չեմ մեկնի: Դեռ որոշ անելիքներ կան», - հայտարարեց դեսպանը:
Հեֆերնին փոխարինողի հիմնական առաջադրանքները նույնը կլինեն. Հայաստանի հետ տնտեսական կապերի խորացում, USAID-ի եւ այլ կազմակերպությունների միջոցով Հայաստանի ժողովրդի համար նոր աշխատատեղերի եւ նոր տնտեսական հնարավորությունների ստեղծում:
Հիշեցնենք, որ հուլիսի 10-ին ԱՄՆ նախագահ Բարաք Օբաման Հեֆերնի առաքելության ավարտին Ռիչարդ Միլսին առաջադրել է՝ որպես Հայաստանում ԱՄՆ դեսպանի պաշտոնի թեկնածու: Ավելի վաղ Միլսը Լիբանանում ԱՄՆ դիվանագիտական առաքելության ղեկավարի տեղակալի պաշտոնն է զբաղեցրել: