News
Լրահոս
News
Ուրբաթ
Մարտ 29
Տեսնել լրահոսը

Երեւանի քաղաքապետին կից երիտասարդության հարցերով խորհրդի  եւ «Ակտիվ երիտասարդ քաղաքացիների նախաձեռնություն» հասարակական կազմակերպության նախաձեռնած «Բանավեճի ակումբը» ամփոփել է երկրորդ տարեշրջանի առաջին խաղափուլը, որին մասնակցել է 60 թիմ։ Եզրափակիչ հասած երեք թիմերով վերջին խաղերի արդյունքներով հաղթող է ճանաչվել «Դավթաշեն» թիմը։

Կազմակերպիչները վստահ են, որ աստիճանաբար ավելի ու ավելի հանրայնացող «Բանավեճի ակումբը» կայացող հարթակ է երիտասարդների համար՝ իրենց հուզող հարցերի շուրջ գրագետ քննարկումներով ինքնարտահայտման համար։

«Ակումբի գործունեության արդյունքներից մեկն էլ այն է, որ երիտասարդները կարողանում են սթափ միտքը գերադասել էմոցիային, իրադրությունը վերլուծել՝ չհեռանալով իրականությունից, պատկերացնել խնդրի ռեալ պատճառը, խոչընդոտը, վերհանել լուծման ուղիներ։ Արդեն երկրորդ տարեշրջանն է, ինչ «Բանավեճի ակումբը» երիտասարդների քննարկմանն է առաջարկում ամենասուր քաղաքական հարցերից մինչեւ կենցաղային նշանակության թեմաներ, այն ամենը ինչ հուզում է երիտասարդներին ու կարող է քննարկման առարկա դառնալ։ Ստեղծվում է սոցցանցերի եւ այլ քննարկումներին առավել առողջ ու արդյունավետ այլընտրանք, կենդանի շփում, բուռն բանավեճ, որը մերժում է շատախոսությունը եւ հաճախ դառնում է առաջարկություն, ինչպես, օրինակ, հեծանվուղու ծրագրի դեպքում էր։ Այդպիսով, ակումբը նաեւ գործնական նշանակություն ունի. հաճախ քննարկվում են  քաղաքապետարանի՝  երիտասարդներին վերաբերող եւ այլ ծրագրեր, վերհանվում, զտվում է դրանց նպատակահարմարությունը՝ երիտասարդների տեսանկյունից»,- նշել է Երեւանի քաղաքապետի օգնական, քաղաքապետին կից երիտասարդության հարցերով խորհրդի փոխնախագահ Սամվել Մերթարջյանը։

«Բանավեճի ակում»-ի խաղերի ժյուրին կազմված է տարբեր մասնագետներից, որպեսզի յուրաքանչյուր խաղ-քննարկմանը ներկա լինի թեմային գիտակ անդամ։

Երկրորդ տարեշրջանի, առաջին խաղափուլը մեկնարկել էր փետրվարից։ Մասնակից 60 թիմերից 35-ը ի սկզբանե որպես թիմ էին հայտագրվել, իսկ 25-ը ձեւավորվել էին անհատ հայտատուներից։

Այս տարեշրջանի երկրորդ խաղափուլի թիմերի հայտագրումը կմեկնարկի օգոստոսի կեսերին, կազմակեպիչների խոսքով՝ խստացված պահանջներով, քանի որ ակումբը կայացման հաստատուն ուղիով է ընթանում։

Տպել
Ամենաշատ