Երեւանում ակտիվանալու են կանաչապատման ուղղությամբ աշխատանքները: Այս մասին նշվել է քաղաքապետարանում տեղի ունեցած հերթական աշխատանքային խորհրդակցության ժամանակ:
Երեւանի քաղաքապետ Տարոն Մարգարյանին զեկուցվել է, որ շարունակվում են ծաղիկների համալրման, ծառերի բուժման, խոտհնձնի, ինչպես նաեւ ոռոգման աշխատանքները: Նշվել է նաեւ, որ վարչական շրջաններում ոռոգումը կազմակերպվում է ինչպես ցերեկային, այնպես էլ գիշերային ժամերին:
Քաղաքապետ Տարոն Մարգարյանը հանձնարարել է առավել ակտիվացնել կանաչապատման ու ծաղկապատման ուղղությամբ տարվող աշխատանքները.
«Կանաչապատման գործընթացը պահանջում է մշտական հետեւողականություն եւ խնամք, հետեւաբար հսկողությունն այս ուղղությամբ եւս պետք է լինի անընդհատ: Այս տարի մենք ավելի քան 20 կմ ընդլայնեցինք ոռոգման ցանցը: Սա կարեւոր ձեռքբերում է կանաչապատման աշխատանքների կազմակերպման տեսանկյունից եւ, ըստ այդմ, ենթադրվում է, որ մեծ ուշադրություն պետք է հատկացվի կանաչ տարածքների, մասնավորապես, սիզամարգերի ստեղծմանն ու պահպանմանը: Իրականացված աշխատանքներն առայժմ գոհացուցիչ չեն, եւ ցանկալի արդյունքի հասնելու համար եղեք ավելի խիստ եւ պահանջկոտ: Կանաչապատման ընկերությունների ղեկավարներից բացի, վարչական շրջանների պատասխանատուները նույնպես անելիքներ ունեն այս հարցում: Անձամբ պետք է լինել տեղերում եւ հետեւել, թե ինչպես են կազմակերպվում աշխատանքները», - ընդգծել է Տարոն Մարգարյանը: