News
Լրահոս
News
Երեքշաբթի
Մարտ 19
Տեսնել լրահոսը


«Լույս» հիմնադրամի կրթաթոշակառու 15 ուսանողներ ու շրջանավարտներ, որոնք  հիմնադրամի «Զարգացնենք Հայաստանը» մեկամսյա ծրագրով վերջին 10 օրերը Դիլիջանում էին անցկացրել, տեղի երիտասարդների հետ համագործակցելով Դիլիջանում բիզնեսի զարգացման ծրագրեր են մշակել: Ուսանողներն այսօր՝ հուլիսի 29-ին, նախագահական նստավայրում հրավիրված հանդիպման ժամանակ իրենց ծրագրերը ներկայացրին ՀՀ նախագահ Սերժ Սարգսյանին:

Երիտասարդները Դիլիջանում 10 օրերի ընթացքում կազմակերպել էին բիզնեսի եւ ֆինանսների վերաբերյալ սեմինարներ, դրամահավաք էին անցկացրել Դիլիջանի մշակույթի կենտրոնի վերանորոգման համար, «Դիլիֆեստ» խորագրով շախմատի առաջնություն կազմակերպել:

Ծրագրի մասնակից, ԱՄՆ Լոս Անջելես քաղաքից ժամանած Սարին Շամիրյանը նախագահին ներկայացրեց դիլիջանցի մի աշակերտի գաղափարը, որով նա առաջարկում է ստեղծել «հեծանիվ սրճարան» եւ դրա միջոցով սուրճ վաճառել Դիլիջանում: 

«Էդ տղան ուզում էր թեյարան ստեղծել: Ինքն էլ զգում էր, որ չկա մի տեղ, որտեղ ընկերների հետ կարող է գնալ,  հաճույք ստանալ: Հետո հասկացանք, որ բարդ է մի տեղ վարձելը սրճարանի համար, կարելի է ավելի հասարակ մի բան անել: Նա առաջարկեց անիվների վրա սրճարան պատրաստել, հեծանիվով սուրճը պտտեցնել քաղաքում ու վաճառել այն»,- NEWS.am-ի հետ զույցում ասաց Սարին Շամիրյանը՝ նշելով, որ մինչեւ ԱՄՆ վերադառնալն ինքը կայցելի այդ տղային, կաջակցի, որ նա իրականացնի իր գաղափարը:

Սարին Շամիրյանի խոսքով՝ ԱՄՆ է վերադառնալու միայն նրա համար, որ ծնողներն այնտեղ են։ Ինչպես աղջիկը նշեց, մեծ ցանկություն ունի հայրենիքում մնալու, առավել եւս, որ  այս ընթացքում արդեն որոշ չափով հասցրել է ծանոթանալ տեղի խնդիրներին, անգամ լուծումներ է գտել դրանց համար: Դիլիջան այցելության ժամանակ շփվել է տաքսու վարորդների հետ, նրանք բողոքել են, որ ստիպված են տաքսու վարորդի աշխատանքը կատարում:

«Բողոքում էին, որ աշխատանքը, որ կա, ոչ թե աշխատանք է, այլ ծառայություն: Վարորդներից մեկը բողոքեց, որ Դիլիջանում մի գործարան կար, դա էլ փակել էին: Շատ էր տխուր, ուզում էր լավ, նպատակով գործ ունենալ, տաքսու վարորդ չլինել»,- ասաց նա:

Սփյուռքահայ երիտասարդի խոսքով՝ նման խնդիրները հնարավոր է լուծել. միայն անհրաժեշտ է, որ մարդիկ համագործակցեն միմյանց հետ, օգնեն իրար: Երիտասարդ աղջկա կարծիքով՝ դրա հետ մեկտեղ պետք է որ Հայաստանում բնակվող հայերն ամենից առաջ արժեւորեն իրենց հայրենիքը:

«Հայ ըլնելը մի ուրիշ բան ա: Նախքան էստեղ գալը ես այս բաները չէի  հասկանում, չէի հասկանում հայ ըլնելու արժեքը: Հիմա հասկանում եմ, որ մեր ապագան սփյուռքում չի, ապագան Հայաստանում ա, էստեղ ա մեր արմատը»,-ասաց Սարին Շամիրյանը: 

Նշենք, որ «Լույս» հիմնադրամն այս տարի 57 ուսանող ունի: Նրանցից 29-ը Հայաստանից են, մնացածը՝ արտերկրում ապրող հայ երիտասարդներն են:

!
Այս նյութը հասանելի է նաև   English
Տպել
Ամենաշատ