Հայաստանյան մամուլն այսօր ճնշումների չի ենթարկվում, որովհետեւ մամուլի հրապարակումների նկատմամբ կա անտարբերություն։ Այսօր՝ հուլիս 29-ին, նման կարծիք հայտնեց «Առավոտ» թերթի գլխավոր խմբագիր Արամ Աբրահամյանը, որը թերթի 20-ամյակի կապակցությամբ հրավիրած մամուլի ասուլիսում ներկայացրեց թերթի անցած ճանապարհը, նաեւ տպագիր մամուլի վիճակը, զարգացման հնարավորություններն ու խոչընդոտները։
«Մամուլի հրապարակումների նկատմամբ, նրանք, ովքեր պետք է ճնշեն, դարձել են բավականին անտարբեր: Դա մի կողմից վատ է, որ չի հասնում մեր խոսքը, եւ մյուս կողմից լավ է այն առումով, որ չեն հարձակվում խմբագրությունների վրա, չեն հրկիզում, թերթեր չեն փակում: Նրանք, ովքեր բողոքում են, միգուցե մի փոքր անկեղծ չեն»,-ասաց Արամ Աբրահամյանը :
Պարոն Աբրահամյանը կարծում է, որ մարդիկ ավելի շատ սիրում են կարդալ վատ լուրեր:
«Եթե ինչ-որ դրական բան ես գրում կամ նկատում մարդիկ ասում՝ բա Լֆիկը, բա Սաշիկը: Եթե գրում ես բացասական բան, ասում են՝ ախ քո ցավը տանեմ , լավ շշեցիր, հախից եկար դրա: Իրենք են մեր ընթերցողները»,- նկատեց խմբագիրը:
Աբրահամյանի կարծիքով՝ թերթերը, չնայած կայքերի մրցակցությանը, կարող են գոյատեւել, եթե ճիշտ բովանդակություն ներկայացնեն։
«Հրատապ մեկնաբանություները, իրադարձությունները պետք է լինեն կայքում, թերթում պետք չէ գրել՝ երեկ տեղի ունեցավ այսինչ ցույցը կամ այսինչ նիստը. դա առնձնապես իմաստ չունի: Թերթում իմաստ ունի գրել վերլուծական հոդվածներ, հարցազրույցներ, որոնք չեն անդրադառնում միայն այսօրվա իրադարձությանը»: