Ճապոնիայի առաջատար ավտոարտադրողներից Toyota Motor Corporation-ը 2014 թվականի առաջին կիսամյակում ռեկորդային թվով՝ 5.09 մլն ավտոմեքենա է վաճառել ամբողջ աշխարհում: Ըստ «ՌԻԱ Նովոստի»-ի, այս մասին ասված է ընկերության տարածած մամուլի հաղորդագրությունում:
Փաստաթղթում նշվում է, որ ընթացիկ տարվա հունվար-հունիսին ընկերության վաճառքի ծավալները՝ հաշվի առնելով Hino Motors Ltd եւ Daihatsu Motor Co. դուստր ձեռնարկությունների ցուցանիշները, կազմել են 5 մլն 97 հազար ավտոմեքենա: Դրանից ավելի քան 4.52 միլիոնը վաճառել է հենց Toyota Motors-ը:
Ավելի վաղ Toyota Motor Corp.-ը տեղեկացրել էր, որ 2013/2014 ֆինանսական տարում, որն ավարտվել է 2014թ. մարտի 31-ին, ընկերության վաճառքի ծավալները՝ հաշվի առնելով Hino Motors Ltd. եւ Daihatsu Motor Co. Դուստր ձեռնարկությունների ցուցանիշները, կազմել են 10 մլն 133 հազար ավտոմեքենա: Ընդ որում, ավելի քան 9 մլն մեքենա վաճառել է հենց Toyota Motors-ը: Ավտոկոնցեռնի մաքուր եկամուտը 2013/2014 ֆինանսական տարում կազմել է 1.82 տրիլիոն իեն (գրեթե 18 մլրդ դոլար), ինչը 1.9 անգամ գերազանցում է նախորդ տարվա նույն ժամանակահատվածի ցուցանիշը (այն կազմել էր 962 մլրդ իրեն):