Հայաստանում թրաֆիքինգի բացահայտված դեպքերի թիվը կրճատվում է, եւ, բարեբախտաբար, նվազում է նաեւ զոհերի թիվը: Այդ մասին այսօր՝ հուլիսի 30-ին՝ թրաֆիքինգի դեմ պայքարի համաշխարհային օրը, հայտարարեց Հայաստանի ոստիկանության կազմակերպված հանցավորության դեմ պայքարի գլխավոր վարչության թրաֆիքինգի դեմ պայքարի բաժնի պետ Ռոբերտ Գրիգորյանը՝ հավելելով, որ եթե 2005-2007թթ. տուժածների թիվը շատ է, ապա ներկայումս վերլուծությունը ցույց է տալիս, որ մեկ քրգործին 1-2 զոհ է բաժին ընկում:
Գրիգորյանի խոսքով՝ Հայաստանը միաժամանակ նաեւ թրաֆիքինգի աղբյուր հանդիսացող երկիր է: «Սակայն վերջին տարիներին արձանագրվել են ներքին թրաֆիքինգի դեպքեր, ինչպես նաեւ Հայաստանի՝ որպես տարանցիկ տարաքի օգտագործումը: 2012թ. –ից մինչեւ 2014թ առաջին կիսամյակը Հայաստանում թրաֆիքինգի հատկանիշներով 31 քրեական գործ է հարուցվել. Այս գործերով տուժած են ճանաչվել 39 մարդ, որոնցից 28-ը՝ կանայք, իսկ հանցագործության պահին տուժողներից 14-ը անչափահաս են եղել», - նշեց Ռոբերտ Գրիգորյանը: Ըստ այդ քրեական գործերի,մեղադրանք է առաջադրբել 29 քաղաքացու նկատմամբ:
