Մոտակա հինգ օրերի ընթացքում օդի ջերմաստիճանը Հայաստանում կհասնի 38 աստիճանի: Այս մասին լրագրողներին հայտնեց «Հայպետհիդրոմետ» ծառայության օդերեւութաբանության կենտրոնի պետ Զարուհի Պետրոսյանը:
Նրա խոսքով՝ վաղը՝ հուլիսի 31-ին, հովտային շրջաններում եւ մայրաքաղաքում սպասվում է մինչեւ 35 աստիճան ջերմություն: Օգոստոսի 1-ին ջերմաստիճանը բարձրանալու է մինչեւ 37 աստիճան, իսկ հաջորդ երկու օրերին՝ մինչեւ 38 աստիճան: Օգոստոսի 4-ից ջերմաստիճանը նվազելու է մինչեւ 34-35 աստիճան:
Օգոստոսին միջին ջերմաստիճանը սպասվում է նորմային մոտ՝ դրական շեղումով, իսկ ամսական տեղումների քանակը՝ նորմայից պակաս: Անձրեւի հավանականությունը լեռնային շրջաններում շատ փոքր է՝ միայն այսօր եւ վաղը, իսկ մնացած օրերին տեղումներ չեն սպասվում:
Ինչ վերաբերվում է հուլիսին, ամսվա առաջին տասնօրյակում ջերմաստիճանը տատանվել է նորմայի սահմաններում, իսկ երկրորդ տասնօրյակում օդի ջերմաստիճանը եղել է նորմային մոտ եւ բարձր: Երրորդ տասնօրյակը դեռ չի ամփոփվել, բայց, ըստ նախնական տվյալների, այն եղել է նորմային մոտ եւ ցածր:
Տարվա ամենաբարձր ջերմաստիճանը գրանցվել է հուլիսի 17-ին, 18-ին եւ 19-ին՝ այն տատանվել է 38.7-39 աստիճանի սահմաններում: Հաջորդ տաք ալիքը՝ 38.7-38.9 աստիճանի սահմաններում, եղել է հուլիսի 25-27-ին: Հուլիսի 28-30-ը օդի ջերմաստիճանը աստիճանաբար նվազել է, եւ երեկ՝ հուլիսի 29-ին գրանցվել է ամենացածր ջերմաստիճանը 32-33 աստիճան:
Ի դեպ, այս տարվա ընթացքում 37 եւ ավելի աստիճան եղել է միայն 6 օր: Զարուհի Պետրոսյանը նշեց, որ թերեւս այդպիսի բարձր ջերմաստիճանով օրեր միշտ էլ եղել են, դրանք առավել հաճախ են գրանցվում վերջին տասնամյակում՝ կլիմայի փոփոխությունների պատճառով: