Երեւանի փոխոստիկանապետ Վալերի Օսիպյանը հերքում է, որ իր եղբորորդին՝ Սեդրակ Օսիպյանը, 3 անգամ մարդ է դանակահարել:
«Ես որոշել եմ լրատվամիջոցների հետ չխոսել, մինչեւ որ քննությունը չավարտվի, բայց ես Ձեզ ասեմ՝ չի համապատասխանում իրականությանը նրանց հայտնածը: Մյուս բոլոր հարցերի հետ կապված դիմեք քննության ավարտից հետո»,- NEWS.am-ի հետ զրույցում Սուսաննա Հովհաննիսյանի հայտարարությանն այսպես արձագանքեց Վալերի Օսիպյանը: Հիշեցնենք, որ Սուսաննա Հովհաննիսյանը հայտարարել էր, որ հունիսի 1-ին Դավիթաշենում Վալերի Օսիպյանի եղբորորդու մասնակցությամբ տեղի ունեցած դանակահարության դեպքից հետո փոխոստիկանապետն առաջարկել է, որ իր որդին` գործով վկա Սարգիս Հովհաննիսյանը, կատարվածի մեղավորությունը վերցնի իր վրա: Հատուկ քննչական ծառայությունն այս պահին քննություն է իրականացնում:
Չնայած Երեւանի փոխոստիկանապետը որոշել է կատարվածի մասին չխոսել, այնուամենայնիվ, նա նշեց, որ Սուսաննա Հովհաննիսյանն ու Գոհար Կարապետյանն իր հարեւանները չեն. «Սուսաննա Հովհաննիսյանն ու Գոհար Կարապետյանը մեր հարեւանները չեն: Հարեւան կլինեինք, եթե նույն շքամուտքից, նույն հարթակից լինեինք, բայց նույն փողոցի 2-3 շենք այն կողմ ապրողները չեն կարող հարեւաններ: Մենք նույն փողոցի բնակիչներ ենք ընդամենը: Իրենք ինձ հարեւաններ չեն»:
Նշենք, որ հուլիսի 30-ին Վալերի Օսիպյանին եւ երկու կանանց հրավիրել էին ՀՔԾ՝ առերեսման, որը տեւեց ավելի քան 7 ժամ: Շենքից դուրս գալիս՝ Օսիպյանը ոչինչ չխոսեց, մինդեռ կանայք պատմեցին, որ Երեւանի փոխոստիկանապետի եղբորորդին 3 անգամ մարդ է դանակահարել:
Ավելի վաղ NEWS.am-ը հայտնել էր, որ դեպքը տեղի է ունեցել հունիսի 1-ի գիշերը Նուբարաշենում: Վիճաբանությունից եւ ծեծկռտուքից հետո 22-ամյա Վանուշ Ալեքսանյանին տեղափոխել էին «Էրեբունի» բժշկական կենտրոն, որտեղ վերջինս վիրահատվել էր: Ըստ ոստիկանության՝ դանակահարողը Երեւանի փոխոստիկանապետ Վալերի Օսիպյանի եղբորորդին է՝ 22-ամյա Սեդրակ Օսիպյանը: Վերջինը, սակայն, մեզ հետ զրույցում նշել էր, որ իր ազգականը ոչ մի կապ չունի դանակահարության հետ: 22-ամյա Սեդրակ Օսիպյանն այժմ հետախուզման մեջ է։
Լուսանկարը՝ Արսեն Սարգսյանի/NEWS.am