Հայաստանի նախագահ Սերժ Սարգսյանը պետք է հետեւի Ուկրաինայի վարչապետ Արսենի Յացենյուկի օրինակին: Այս մասին հուլիսի 31-ին կայացած ասուլիսում հայտարարեց ՀՀ նախագահի նախկին թեկնածու, ԱԻՄ նախագահ Պարույր Հայրիկյանը:
Նրա խոսքով, քաղաքական ցանկացած գործիչ, ով չի կարողանում իրականացնել իր ծրագրերը, պետք է հրաժարական ներկայացնի եւ հեռանա իշխանությունից, ինչպես այդ արեց ուկրաինական վարչապետը:
«Բայց հայերը նման ավանդույթ չունեն: Սերժ Սարգսյանը, չնայած կրկնակի ֆիասկո ապրեց, քանի որ նախ հրաժարվեց Եվրամիության հետ համագործակցությունից, իսկ հետո անհաջողության մատնվեց Եվրասիական միությունում, շարունակում է մնալ իշխանության ղեկին, ինչն անընդունելի է»,- ընդգծեց Հայրիկյանը:
Նա տեղեկացրեց, որ ԱԻՄ-ն ուղերձ է պատրաստել, որը ներկայացնելու է օգոստոսի 8-ին: Դրանում նշվում են բոլոր այն դժվարությունները, որոնց բախվել է Հայաստանը եվրասիական ուղին ընտրելուց հետո:
«Խնդիրը հողի մի կտոր ձեռք բերելու կամ կորցնելու մեջ չէ, այլ նրանում, թե այսօր ինչպես է աշխարհն ընկալում մեր երկիրը: Իսկ մենք այսօր համարվում ենք Ռուսաստանի սպասավորը եւ երկիր, որն ագրեսիվ գործողություններ է նախաձեռնել հարեւան Ադրբեջանի դեմ: Այս ամենի մեղավորն իշխանություններն են՝ Լեւոն Տեր-Պետրոսյանից մինչեւ Սերժ Սարգսյան»,- ամփոփեց Հայրիկյանը:
