Ուկրաինայի Գերագույն Ռադան չի ընդունել երկրի վարչապետ Արսենի Յացենյուկի հրաժարականը: Հրաժարականի որոշման օգտին քվեարկել է 16 պատգամավոր՝ անհրաժեշտ 226-ի փոխարեն:
Քվեարկությունից հետո Յացենյուկը հայտարարել է. «Հարգելի Ուկրաինայի ժողովրդական պատգամավորներ, այսօր երկու լուր կա: Առաջինն այն է, որ Արգենտինան դեֆոլտ է հայտարարել, եւ երկրորդը, որ Ուկրաինան դեֆոլտ չի հայտարարել եւ երբեք չի հայտարարի»: Այս մասին գրում է ЛІГА-ն:
Անցյալ շաբաթ խորհրդարանը հրաժարվել էր քվեարկել կառավարության օրինագծերի օգտին, ինչից հետո Յացենյուկը հայտարարել էր իր հրաժարականի մասին: Կառավարության ղեկավարը նշել էր, որ խորհրդարանում այդ օրինագծերի ձախողումն «առկախեց 1.5 մլրդ դոլարը, որոնք Ուկրաինային տրամադրելու ճանապարհին էին»:
«Այդ 500 մլն դոլար էր՝ Համաշխարհային բանկից եւ 1 մլրդ դոլար՝ Արժույթի միջազգային հիմնադրամից: Այդ օրինագծերի քվեարկության բացակայություն, եւ հաջորդ քայլը՝ երկրի դեֆոլտ»,- ասել էր վարչապետը:
