ԵԱՀԿ Մինսկի խումբը մեզ համար ամենարդյունավետ աշխատող միջազգային կառույցներից մեկն է, մենք երախտապարտ ենք նրանց, սակայն սա չի նշանակում, որ մեր բախտը կապված է Մինսկի խմբից, և մենք ի վիճակի չենք ապահովել մեր երկրի անվտանգությունը: Այս մասին, «Արցախպրես»-ի հաղորդմամբ, հուլիսի 30-ին ԵՊՀ ուսանողական խորհրդի նախաձեռնությամբ իրականացվող «Բանակում-2014» հավաքին հյուրընկալվելու ժամանակ ասել է Արցախի նախագահ Բակո Սահակյանը:
«Կողմերը պիտի երախտապարտ լինեն միջազգային հանրությանը, ի դեմս Մինսկի Խմբին կատարած աշխատանքի համար: Այն, որ Ադրբեջանը հաճախ քննադատում է ՄԽ-ին` նշելով, որ պետք է վերանայել ձևաչափը` կեղծ է: Իրականում նրանք այդպես չեն մտածում, այլ փորձում են խորամանկություն անել: Ադրբեջանի հաջողությունը, բարեկեցության ներկայիս աստիճանը, զարգացող տնտեսությունն անմիջականորեն կապված են այդ խմբի աշխատանքներից: Եվ նրանք (ադրբեջանցիները-հեղ) զուրկ են մարդկային գնահատականներ տալուց»,- ասաց նա:
Նախագահը հավաստիացրեց նաև, որ շարունակելու է իր գործընկերների հետ լինել այնպիսին, ինչպիսին այժմ է:
«Ես երախտապարտ եմ իմ գործընկերներին թեկուզ այն բանի համար, որ մենք ունենք հարաբերական խաղաղություն: Ձեզ հետ միասին մի այնպիսի երկրում ենք, որ անցել է պատերազմով, և չենք ուզում այն կրկնվի: Մենք այսօր չենք ուզում, որ ռազմական գործողությունները վերսկսվեն»,- նշեց Բակո Սահակյանը:
