Իսրայելն ու ՀԱՄԱՍ-ը, օգոստոսի 1-ից սկսած, Գազայում 72-ժամյա «հումանիտար հրադադար» կհայտարարեն: Պայմանավորավածության մասին հայտնել է ԱՄՆ պետքարտուղար Ջոն Քերին եւ ՄԱԿ-ի գլխավոր քարտուղար Պան Գի Մունը, հաղորդում է BBC-ի ռուսական ծառայությունը:
Այս տարածքում երեք ու կես շաբաթյա մարտերի ընթացքում սպանվել է 1400 պաղեստինցի, որոնց մեծ մասը խաղաղ բնակիչներ են, եւ բյուրավոր մարդիկ հարկադրված լքել են իրենց տները:
Գործողության ընթացքում սպանվել է 58 իսրայելցի, այդ թվում 56 զինվոր եւ 2 խաղաղ քաղաքացի: Գազայում աշխատող ՄԱԿ-ի գործակալության ղեկավար Պիեռ Կրախենբյուլը հայտարարել է, որ ՄԱԿ-ի կողմից տրամադրված ապաստարաններում թաքնվող մոտ քառորդ միլիոն պաղեստինցի փախստականներ գտնվում են աղետալի պայմաններում եւ կանգնած են անդունդի եզրին:
Իսրայելը Գազայում իր գործողություններով խիստ քննադատության է արժանացել, այդ թվում՝ իր մերձավոր դաշնակցի՝ ԱՄՆ-ի կողմից:
