Գյումրիի քաղաքապետ Սամվել Բալասանյանը «չեզոք վերաբերմունք» ունի Գյումրիի նախկին քաղաքապետ Վարդան Ղուկասյանի որդու՝ Սպարտակի Ղուկասյանի դեմ հարուցված քրեական գործը կարճելու վերաբերյալ: Այս մասին NEWS.am-ին հայտնեցին քաղաքապետարանի մամուլի ծառայությունից:
«Մենք որեւէ տեղեկատվության չենք տիրապետում, ինչ գիտենք, գիտենք մամուլի հրապարակումներից: Մնացածի վերաբերյալ դիմեք իրավապահ մարմիններին, իսկ քաղաքապետն էլ չեզոք վերաբերմունք ունի»,- ասացին մամուլի ծառայությունից:
Նշենք, որ հենց Սամվել Բալասանյանի տան մոտ տեղի ունեցածի վերաբերյալ էր ոստիկանությունը գործ հարուցել: Հիշեցնենք, որ 2014թ. հունվարի 21-ին ժամը 20.00-ի սահմաններում, Սպարտակ Ղուկասյանը՝ հարբած վիճակում, մի խումբ ընկերների հետ, երկու մեքենայով գնացել է Սամվել Բալասանյանի տուն ու հերթական «դեբոշը» սարքել: Գյումրիի նախկին քաղաքապետի որդին եւ նրա ընկերները գոռգոռացել են, հայհոյել Բալասանյանին, սպառնացել, թե «խփել կտանք»: Տարածքի բնակիչները վախից փակել են դռները եւ հեռացել, իսկ Գյումրիի քաղաքապետը տանը չի եղել, նա այդ ժամանակ ԱՄՆ-ից վերադառնում էր Հայաստան: Բալասանյանի ընտանիքի անդամները որեւէ կերպ չեն արձագանքել Սպարտակ Ղուկասյանի հերթական «ներկայացմանը»: Ավելի ուշ այս ամենի տեսագրությունը հայտնվել է համացանցում: Սպարտակ Ղուկասյանին մեղադրանք էր առաջադրվել ՀՀ քրեական օրենսգրքի 258 հոդվածի 1-ին մասի (խուլիգանություն) հատկանիշներով: Խափանման միջոց էր ընտրվել ստորագրություն քաղաքից չբացակայելու մասին: Հուլիսին հարուցված գործը կասեցվել էր:
