Ճապոնիայի կառավարությունը հրապարակել է անվանումների ցանկը, որոնք նա տվել է Չինաստանի հետ վիճելի Սենկակու կղզիներին (չինական անվանումը՝ Դյաոյույդաո): Այս մասին գրում է «ՌԻԱ Նովոստի»-ն:
Փոքրիկ նեղուցով բաժանված երկու կղզիներ Նանտոկոձիմա անունն են ստացել, ինչը թարգմանաբար նշանակում է «Հարավ-արեւելյան փոքր կղզի», մնացած երեքը կոչվում են Նանսեյկոձիմա («Հարավ-արեւմտյան փոքր կղզի»), Հիգասիկոձիմա («Արեւելյան փոքր կղզի») եւ Սեյհոկուսեյկոձիմա («Արեւմտյան հյուսիս-արեւմտյան փոքրիկ կղզի»): Կղզիների անվանումները նշվելու են նոր քարտեզներում:
Ճապոնիան հայտարարում է, որ, ընդհանուր առմամբ, իրեն են պատկանում շուրջ 500 հեռավոր կղզիներ, որոնք նշանակություն ունեն երկրի ջրային տարածքները որոշելու համար: Դրանցից 158 փոքր անմարդաբնակ կղզիները մինչեւ հիմա անուն չեն ունեցել:
Չինաստանի հետ հարաբերությունների սրացումից հետո Ճապոնիան որոշել է այդ կղզիներին պաշտոնապես աշխարհագրական անուններ տալ՝ դրանց նկատմամբ իր իրավունքը հաստատելու համար: Ուրբաթ հրապարակված ցանկում նշված են բոլոր 158 կղզիների անունները:
