«Արայ» ընկերության նախկին սեփականատեր, 2011թ.-ին իր մեքենայում հրազենային վնասվածքով մեռած հայտնաբերված Արմեն Պետրոսյանի 6-ամյա դուստրը շարունակում է մնալ մոր՝ Տատյանա Չադենկովայի մոտ, չնայած որ երեխայի տատիկը 1.5 տարի առաջ դիմել էր դատարան՝ թոռան խնամակալությունն իր վրա վերցնելու համար: Այս մասին NEWS.am-ին ասաց Տատյանա Չադենկովայի փաստաբան Նարինե Ռշտունին:
«Դատական պրոցեսը դեռ շարունակվում է, դատաքննության փուլին էլ դեռ չենք հասել: Հայցվորի՝ Կարինե Սուքիասյանի փաստաբանն իր կասկածներն է ներկայացրել, բայց ոչ մի ապացույց չի ներկայացրել, իսկ երեխան էլ մոր հետ բնակվում է Ռուսաստանում: Դատերին էլ մենք ներկայացուցիչներով ենք լինում, ոչ Տատյանան, ոչ էլ Կարինե Սուքիասյանն այսքան ժամանակ չեն եկել դատերին»,- ասաց փաստաբանը:
Նրա խոսքով՝ հայցվորի ներկայացուցիչը մի քանի անգամ հետաձգել է դատը, սակայն ինչ պատճառով, ինքը տեղյակ չէ. «Հաջորդ նիստը կկայանա սեպտեմբերին: Տեսնենք՝ ինչքան կձգվի»:
Կարինե Սուքիասյանի ներկայացուցիչ, փաստաբան Սամվել Դավթյանն էլ NEWS.am-ի հետ զրույցում հրաժարվեց որեւէ հարցի պատասխանել:
Նշենք, որ «Արայ» ընկերության մահացած սեփականատիրոջ՝ Արմեն Պետրոսյանի, մայրը անցած տարվա հուլիսի 12-ին դիմել էր Արաբկիր եւ Քանաքեռ-Զեյթուն ընդհանուր իրավասության դատարան՝ թոռան խնամակալությունն ստանալու համար, քանի որ 2012թ. նոյեմբերի 20-ին,Արմեն Պետրոսյանի այրին` Տատյանա Չադենկովան, 6-ամյա դստերը դատական կարգով վերցրել էր սկեսուրից:
Ավելի վաղ NEWS.am-ը տեղեկացրել էր, որ 2011թ. հոկտեմբերի 16-ին, Սեւան-Երեւան մայրուղուց դեպի Գետամեջ գյուղ տանող հողածածկ ճանապարհին կայանված «BMW X-5» մակնիշի ավտոմեքենայում հայտնաբերվել էր «Արայ»-ի սեփականատեր, 31-ամյա Արմեն Պետրոսյանի դիակը` քունքի մասում հրազենային վնասվածքի հետքով: Նրա աջ ձեռքին` մատը ձգանին եղել է «ՏՏ» տիպի ատրճանակ` պահունակում 6 փամփուշտով: Փաստի առթիվ Կոտայքի քննչական բաժանմունքում քրեական գործը հարուցվել էր «ինքնասպանության հասցնելու» եւ «ապօրինի զենք-զինամթերք» հոդվածների հատկանիշներով: