Փարիզի քրեական ոստիկանության շենքից 51 կգ կոկաին է անհետացել: Այս մասին տեղեկացնում է Лента.Ру-ն՝ վկայակոչելով Le Parisien պարբերականին:
Փարիզի իրավապահները թմրանյութն առգրավել էին դեռեւս հուլիսի 4-ին, թմրավաճառների ցանցի ոչնչացման հաջող գործողության արդյունքում: Այդ ժամանակ կոկաինի խոշոր խմբաքանակ էր առգրավվել՝ 2.5 մլն եվրո ընդհանուր արժողությամբ: Այն փոխադրել են ոստիկանության եւ պահել հատուկ տարածքում, որտեղ մուտք ունեն միայն ավագ սպաները:
Կորուստը հայտնաբերել են ապացույցների հերթական ստուգման ժամանակ: Անցյալ ամբողջ գիշերը ոստիկանության կենտրոնակայանում խուզարկություն է կատարվել՝ հատուկ վարժեցրած շների օգնությամբ: Բայց ջանքերն ապարդյուն են անցել:
Փարիզի դատախազությունը գործ է հարուցել: Արդեն հայտնի է առաջին ձերբակալվածների մասին: Նրանք իրավապահ մարմինների աշխատակիցներ են, ովքեր առաջինն են հայտնաբերել թմրանյութերի անհետացումը:
Սա տարեսկզբից փարիզյան ոստիկանների մասնակցությամբ արդեն երկրորդ միջադեպն է: Ապրիլին Կանադայից 34-ամյա զբոսաշրջիկ կինը Քե դ՛Օրֆեւրից երկու ոստիկանի մեղադրել էր խմբակային բռնաբարության համար:
