Հուլիսի 31-ին ադրբեջանական դիվերսիայի հետեւանքով զոհված ժամկետային զինծառայող Ազատ Ասոյանը աշնանը զորացրվելուց հետո պետք է շարունակեր կիսատ թողած ուսումը. մինչեւ զորակոչվելն ընդունվել էր ԵՊՀ իրավաբանական ֆակուլտետ: Այս մասին NEWS.am-ին պատմեց Ազատ Ասոյանի հարեւաններից Դոնարա Կոստանյանը:
«Իրենց ընտանիքը շատ հարգված, շատ լավն է: Ազատը սպորտսմեն տղա էր, կարատեի էր գնում, արտաքինով էլ շատ սիրուն տղա էր, կինոյում է խաղացել: Տղաս «Որոգայթ» ֆիլմի ռեժիսորն էր, իրեն, որպես սիրուն տղայի, դեր տվեց կինոյում։ Էնքան բոյով, սիրուն, հարգանքով, պատվով, արտակարգ տղա էր: Շատ լավ է սովորել դպրոցում, շատ խելացի տղա էր, ընդունվեց իրավաբանական, տարան բանակ: Ընկերասեր, բարեկամասեր տղա էր, ընկերուհի ուներ»,- պատմեց հարեւանուհին:
Հարեւանուհու խոսքով՝ տղան 10 օր առաջ էր արձակուրդ եկել: Թոռան զոհվելու մասին դեռ չգիտի 20-ամյա Ազատի՝ ԱՄՆ-ում գտնվող տատիկը: Կրտսեր եղբայրը գիշերը վերադարձել է Ռուսաստանից։
Հուլիսի 26-ին Ազատ Ասոյանի 20-ամյակն է եղել, սակայն դիրքերում է եղել եւ ընտանիքի անդամները չեն կարողացել խոսել հետը:
«Իր մայրը ծննդյան առիթով ամեն ինչ ուղարկել էր, բայց հետը չէր կարողացել խոսել: Դրա համար դարդ էր անում, ասում էր՝ գոնե երեխուս հետ խոսեի»,-պատմեց Դոնարա Կարապետյանը:
Ազատը ծնվել ու մեծացել է այն շենքում, որտեղ բնակվում է նրա ընտանիքը։ Հարեւանները, տիկին Դոնարայի խոսքով, հարազատի նման են սիրել Ազատին, ու հիմա էլ հարազատի նման սգում են նրա մահը։
Ավելի վաղ NEWS.am-ը հայտնել էր, որ հուլիսի 31-ին հակառակորդը հարձակում էր գործել հյուսիսային հատվածում մարտական հերթապահություն իրականացնող զորամասերից մեկի պահպանության տեղամասի ուղղությամբ: Դիրքապահ անձնակազմի կողմից հանդիպելով կազմակերպված դիմադրության՝ հակառակորդը, կրելով բազմաթիվ կորուստներ, հետ է շպրտվել ելման դիրքեր: Գործողության հետեւանքով զոհվել են ՊԲ զինծառայողներ, 1994թ. ծնված Արարատ Վաչիկի Խանոյանը եւ Ազատ Արթուրի Ասոյանը: