Հայկական տեխնոլոգիաները կարող են հաջողությամբ իրացվել Ռուսաստանի արդյունաբերական սուբսիդիաների օգնությամբ: Այս մասին NEWS.am-ի թղթակցի հետ զրույցում հայտարարեց Հայաստանի հայրենական արտադրողների միության նախագահ Վազգեն Սաֆարյանը՝ մեկնաբանելով արդյունաբերական սուբսիդիաների հարցում Եվրասիական տնտեսական միության (ԵՏՄ) հետ համագործակցության վերաբերյալ Հայաստանի կառավարության մտադրությունը:
Ամեն դեպքում, ըստ Սաֆարյանի, անհրաժեշտ է այնպես անել, որ հայկական կողմը համաֆինանսավորի սեփական նախագծերը: «Այդ դեպքում համագործակցությունը կարող է բավական հեռանկարային լինել: Մենք գիտատեխնիկական մշակումներ ունենք, նրանք՝ ֆինանսական եւ էներգետիկ ռեսուրսներ: Այս ամենի համադրումը կարող է լավ արդյունքների հանգեցնել»,- ընդգծեց Սաֆարյանը:
Միաժամանակ, նրա խոսքով, ցանկալի կլիներ առաջընթաց տեսնել արդեն գործող ծրագրերում, այդ թվում՝ «Նաիրիտ»-ի հարցում: «Առայժմ ոչ մի արդյունք չենք տեսնում, իսկ դա անհանգստացնում է»,- հայտարարեց Վազգեն Սաֆարյանը:
Հիշեցնենք, որ 2012 թվականից Եվրասիական տնտեսական միությունում գործում է Արդյունաբերական սուբսիդիաների տրամադրման միասնական կանոնների մասին համաձայնագիրը: Այն խթանում է արտադրության զարգացումը, սակայն արգելում է Միության շրջանակում «սուբսիդիաների մրցավազքը»՝ որպես արտահանման ինքնանպատակ: Մայիսի սկզբին Հայաստանի կառավարությունն առաջին քայլն արեց Համաձայնագրի մաս կազմելու ուղղությամբ՝ Էկոնոմիկայի նախարարությանը հաստատելով որպես արդյունաբերական սուբսիդիաների հարցերով ԵՏՄ-ի հետ բանակցությունների համակարգող մարմին: