Իսրայելական բանակը զինծառայողի որոնման գործողություն է սկսել, որին, ինչպես ենթադրում են, Գազայի հատվածում պատանդառել են ՀԱՄԱՍ-ի զինյալները:
Զինվորականների տեղեկությունների համաձայն, զինյալները հարձակվել են իսրայելական ստորաբաժանման վրա, որը Գազայի հատվածից դեպի Իսրայելի տարածք տանող թունելներից մեկն էր ոչնչացնում: Հարձակվողներից մեկը պայթեցրել է իր վրա ամրացված ռումբը, ինչի արդյունքում վիրավորված իսրայելական զինվորներից մեկն անհետացել է:
BBC-ի ռուսական ծառայության փոխանցմամբ, այդպիսով ավելի վաղ հայտարարված 72-ժամյա հրադադարը, փաստորեն, խախտվել է:
Իսրայելը դրա համար մեղադրում է ՀԱՄԱՍ խմբավորմանը, սակայն մինչ այդ հայտարարել էր, որ շարունակելու է ՀԱՄԱՍ-ի թունելները ոչնչացնել նույնիսկ հրադադարի ընթացքում:
Գազայի հատվածի խաղաղ բնակիչներին խորհուրդ են տվել դուրս չգալ տներից: Պաղեստինյան կողմի տվյալներով, առավոտյան ծանր հրետանուց կրակոցներ են արձակվել Ռաֆահ քաղաքի ուղղությամբ, ինչի հետեւանքով 27 մարդ է մահացել: