ԱՄՆ նախկին նախագահ Բիլ Քլինթոնը 2001 թվականին Առեւտրի համաշխարհային կենտրոնի երկնաքերների վրա հարձակման նախօրեին ասել է, որ կարող էր ոչնչացնել «Ալ Քաիդա» միջազգային ահաբեկչական կազմակերպության նախկին ղեկավար Ուսամա բեն Լադենին: Այս մասին գրում է РИА Новости գործակալությունը՝ հղում կատարելով Politico-ին:
Նման հայտարարություն Քլինթոնն արել է 2001 թվականի սեպտեմբերի 10-ին Ավստրալիայում գործարարների հետ ընթրիքի ժամանակ: Նախկին նախագահի ելույթի ձայնագրությունը տարածել է Sky News հեռուստաընկերության ավստրալական մասնաճյուղը: Այն լրագրողներին է տրամադրել տեղական քաղաքական գործիչներից մեկը:
«Ես գրեթե հասել եմ նրան: Եվ ես կարող էի սպանել նրան, բայց այդ դեպքում ստիպված կլինեի ոչնչացնել Քանդահար անունով փոքրիկ քաղաքն Աֆղանստանում եւ սպանել 300 անմեղ կանանց ու երեխաների: Այդ ժամանակ ես նրանից ավելի լավը չէի լինի: Այդ պատճառով էլ չեմ արել այդ»,- Քլինթոնին վերագրվող խոսքերն է մեջբերում պարբերականը:
Նշվում է, որ Քլինթոնը, ամենայն հավանականությամբ, խոսել է 1998 թվականի դեկտեմբերին բեն Լադենին ոչնչացնելու հնարավորության մասին:
Նախկին նախագահի ներկայացուցիչներն առայժմ չեն մեկնաբանել այս տեղեկությունը: