Հայաստանի հյուսիսային Շիրակի մարզի ֆերմերներից բանջարեղենը գնելու են՝ արտահանելու նպատակով: Այս մասին NEWS.am-ի թղթակցի հետ զրույցում նշեց «Սպայկա» ընկերության ծրագրերի կառավարման բաժնի ղեկավար Կարեն Բաղդասարյանը: Նրա խոսքով, այս տարի առաջին անգամ ընկերությունը ֆերմերներին սերմացու եւ տնկիներ է տրամադրել՝ պարտավորվելով հաջորդ տարվա բերքն ամբողջությամբ գնել ֆիքսված գներով:
«Նախկինում մենք գնում էինք բերքը, իսկ հիմա, փաստորեն, պատվիրում ենք այն: Երաշխավորված իրացումը, իհարկե, շահավետ է ֆերմերների համար, սակայն մեզանից էլ, Ռուսաստանում կամ այլուր, միայն որակյալ մթերք են գնելու: Այդ պատճառով մենք համագործակցում ենք փորձառու ֆերմերների հետ, ովքեր կարող են ապահովել այդ որակը»,- պարզաբանեց Բաղդասարյանը:
Հավելենք, որ «Սպայկա» ընկերությունը զբաղվում է Հայաստանից թարմ մրգերի եւ բանջարեղենի արտահանմամբ, հիմնականում՝ Ռուսաստան: