Բաքվում ձերբակալել են տաքսու վարորդի, որն առաջարկել է ուղեւորին ինտիմ կապի մեջ մտնել: Այդ մասին հաղորդում են ադրբեջանական լրատվամիջոցները:
Պարբերականի տվյալներով՝ Աբշերոնի շրջանի 42-ամյա բնակիչը (նրա անունը չի նշվում), ով աշխատում էր որպես տաքսու վարորդ, փորձել է սեռական կապի մեջ մտնել 24-ամյա ուղեւորի հետ (որի անունը նույնպես չի հրապարակվում): Վերջինս տաքսի է նստել քաղաքի կենտրոնական շրջանում, ավելի ուշ վարորդը կանգնեցրել է մեքենան ամայի վայրում ու առաջարկել ուղեւորին սեքսով զբաղվել: Երիտասարդը մերժել է: Ինչպես հաղորդում են, «125 մանաթի (160 դոլար) փրկագնի դիմաց նա ազատվել է հոմոսեքսուալիստից ու արագ հեռացել»:
Երիտասարդը գրանցել է մեքենայի համարն ու ոստիկանություն դիմել: Ոստիկաններն արագ պարզել են վարորդի անձը: Այս պահին որոշում են նրա դեմ սահմանվող խափանման միջոցը: Քննիչները ենթադրում են, որ նախկինում նա այլ ուղեւորների նույնպես անհանգստացրել է: Չի հստակեցվում, թե ինչպես են որակավորվել վարորդի գործողությունները:
Ինչպես նշվում է, նախկինում Ադրբեջանում քրեական պատասխանատվություն է գոյություն ունեցել նույնասեռական հարաբերությունների համար, սակայն 2000թ.-ին այն վերացվել էր:
