Ռուսաստանը կոչ է անում Իսրայելին եւ Գազայի պաղեստինյան խմբավորումներին դադարեցնել մարտական գործողությունները, նշվում է Ռուսաստանի արտգործանախարարության հաղորդագրության մեջ, հաղորդում է ՌԻԱ Նովոստին:
Օգոստոսի 1-ի գիշերը հայտարարվել է Իսրայելի եւ Գազայում գործող պաղեստինյան խմբավորումների միջեւ համաձայնություն 72 ժամով կրակի դադարեցման շուրջ հումանիտար դրդապատճառներից ելնելով: Նկատի էր առնվում, որ նշված ժամանակում հատվածում կլուծվեն անհետաձգելի հումանիտար խնդիրները, այդ թվում նաեւ վիրավորիներին օգնություն ցույց տալու, ջրի եւ էլեկտրաէներգիայի մատակարարման վերականգման կապակցությամբ: Օգոստոսի 1-ի առավոտյան համաձայնությունն ուժի մեջ մտավ, սակայն մի քանի ժամ էլ չտեւեց: Երկու կողմերն էլ մեղադրում են միմյանց հրադադարի խախտման մեջ: ԶԼՄ-ի հաղորդագրությունների համաձայն՝ վերսկսված ռազմական գործողությունների հետեւանքով մի քանի տասնյակ պաղեստինցի ու 2 իսրայելցի զինվորներ են զոհվել, եւս մեկն իսրայելական բանակից գերի է վերցվել:
«Հարկավոր է ամեն ինչ անել, որպեսզի հումանիտար հրադադար սկսելով՝ խզվի բռնության շրջանը, ինչը մարդկային զոհերի է հանգեցնում եւ էապես վնասում է քաղաքացիական ենթակառույցներին: Ռուսաստանն իր հերթին շարունակում է աջակցել իրավիճակի մեղմացման նպատակով»,- նշվում է ռուսական ԱԳՆ հաղորդագրության մեջ: