Պետությունը 21 մլրդ դրամ (ընթացիկ փոխարժեքով՝ 51 մլն դոլար) է հատկացրել Հայաստանի երկու խոշորագույն քիմիական գործարանների ՝«Նաիրիտի» եւ «Վանաձոր-Քիմպրոմի» աշխատավարձի գծով պարտավորությունների մարման համար: Այդ մասին այսօր՝ օգոստոսի 8-ին, լրագրողներին հայտարարեց Էներգետիկայի նախարար Երվանդ Զախարյանը:
Այդ միջոցները հաշվեգրվել են «Երեւանի ՋԷԿ» ՓԲԸ եւ «Բարձրավոլտ էլեկտրացանցեր» ՓԲԸ պետական էներգետիկ ձեռնարկությունների շրջանառությունից: «Կառավարությունում օրումեջ, եթե ոչ ամեն օր, քննարկվում է «Նաիրիտի» իրավիճակը: Քաղաքացիները իրավունք ունեն ստանալ 15-17 ամիսների ընթացքում կուտակված ողջ աշխատավարձը, եւ պետությունը կպաշտպանի նրանց իրավունքները», - հայտարարեց նախարարը:
Կառավարությունն այդ նույն դիրքորոշումն ունի նաեւ Վանաձորի քիմիական գործարանի շուրջ, թեեւ այդ ձեռնարկությունը ամբողջովին մասնավոր է: «Նաիրիտ» - ում բաժնետոմսերի գոնե 10%-ը պետությանն է, իսկ «Վանաձոր-քիմպրոմը» ամբողջովին մասնավոր է: Սակայն տվյալ դեպքում դա ոչնիչ չի փոխում: Մարդիկ այնտեղ նույնպես աշխատավարձի հետ կապված խնդիրներ ունեն եւ մենք պետք է պաշտպանենք նրանց օրինական շահերը», - ասաց նախարարը:
