Հայտնի է, որ գարնան սկզբին Հայաստանում անբարենպաստ եղանակային պայմանները հանգեցրին սպասվող բերքի ոչնչացման, հատկապես՝ մրգերի: Շուկան անմիջապես արձագանքեց գների բարձրացմամբ: Մայրաքաղաքում հունիսին խնձորի մանրածախ գինը տարվա կտրվածքով աճեց 1.4 անգամ, տանձի գինը՝ շուրջ 1.3 անգամ, դեղձի գինը՝ 1.2 անգամ:
Ռեկորդ սահմանեց ծիրանը. այս մրգի գինը բարձրացավ գրեթե 5 անգամ: Միջին գինը մայրաքաղաքում գերազանցում էր 1.8 հազար դրամը՝ կիլոգրամի դիմաց: Ընդ որում, լավագույն որակի մթերքը գյուղատնտեսական շուկաներում առաջարկվում էր 1 կգ-ի դիմաց՝ 2 եւ ավելի հազար դրամ: Համեմատության համար նշենք, որ նույն ամսում նարնջի գինը կազմում էր 700 դրամ, բանանի գինը՝ 900 հազար դրամ՝ 1 կգ-ի դիմաց:
Բանջարեղենի բերքը, ըստ հունիսի գների պաշտոնական տվյալների, ցրտահարության հետեւանքով այնքան էլ չէր տուժել: Ամեն դեպքում, վիճակագրությունը մայրաքաղաքում գրանցել է կաղամբի, լոլիկի, վարունգի, ստեպղինի, ճակնդեղի, սմբուկի միջին մանրածախ գնի իջեցում: Թանկացել են սխտորը եւ սոխը, որոնց ռեսուրսների մի մասը ներկրվում է, համապատասխանաբար, 36.2 եւ 3.1 տոկոսով:
Հետաքրքիր իրավիճակ է տիրում մսամթերքի շուկայում: Տավարի միսը 8.4 տոկոսով էժանացել է, իսկ խոզի միսը՝ 22.0 տոկոսով թանկացել: Արդյունքում, տավարի ու խոզի մսի գնի համահարաբերակցությունը 1.5 անգամ ավելացել է:
Հասկանալի է, որ սննդամթերքի առանձին տեսակների գները ձեւավորվում են բնակչության տարբեր խմբերի պահանջարկի ազդեցությամբ: Օրինակ, հացի գինը տարվա ընթացքում մայրաքաղաքում ավելացել է «ընդամենը» 0.1 տոկոսով:
Թե ինչպես են հաց արտադրող մեծ ու փոքր գործարանները համարձակվում դիմակայել գնաճին (այդ թվում՝ էներգակիրների սակագների աճին), մնում է միայն գուշակել: Սակայն ժողովրդի շրջանում մթերքի թերի լինելու մասին լուրեր են տարածվում, երբ քչանում է հացի քաշը, սակայն պահպանվում է նախկին գինը եւ այլն:
Իսկ ահա ձկնկիթի միջին գինը (այսպես կոչված «կարմիր ձկնկիթի») մայրաքաղաքում աճել է 1.3 անգամ՝ հունիսին հասնելով 70.3 հազար դրամի 1 կգ-ի դիմաց: Պատճառները հայտնի են. թանկացել է ռուսական կարմիր ձկնկիթը: Սակայն այս մթերքի գնորդները կարող են առաջնորդվել հետեւյալ կարգախոսով. «Գնել ենք, շարունակելու ենք գնել»: Սահմանափակ ընտանեկան բյուջեով տնային տնտեսությունների համար գների բարձրացումը, օրինակ՝ էներգակիրների սակագների, էապես անդրադարձավ նրանց գնողունակության վրա: