Օգոստոսի 7-ին գերի ընկած եւ հաջորդ օրը սպանված Չինարի գյուղի բնակիչ Կարեն Պետրոսյանի մահվան փաստով հարուցված քրեական գործի շրջանակներում ձեռք բերված տվյալները հիմք են տալիս առաջ քաշել այն վարկածը, որ Կարեն Պետրոսյանին առևանգել են հայկական տարածքից։ Այս մասին NEWS.am-ին ասաց Քննչական կոմիտեի նախագահի մամուլի քարտուղար Սոնա Տռուզյանը:
«Քննություն է տարվում՝ պարզելու գերեւարման եւ մահվան հանգամանքները: Այս պահի դրությամբ քննության ձեռք բերված տվյալները վկայում են այն մասին, որ Պետրոսյանը առեւանգվել է հայկական տարածքից, որովհետեւ նախ եւ առաջ նախկինում գյուղացիների՝ միմյանց այցելելու, թեյելու նախադեպեր չեն եղել, նման կապեր երկու երկրների միջեւ չի եղել, որ մտածենք, որ այցելել են միմյանց: Այս մասին մեզ ասել են գյուղացիները: Երկրորդ՝ Պետրոսյանն այդ օրն առավոտյան ավանակով գնացել էր հանդամաս վառելափայտ բերելու, որն սահմանակից է Ադրբեջանին եւ այդ կողմից տարածքն ականապտված է: Այսինքն այդ ճանապարհով կարող է անցնել այդ տարածքին քաջածանոթ մարդը: Ավանակը հայտնաբերվել է հայկական տարածքից, ինչը վկայում է, որ ականապատված տարածքը ավանակով չի մտել, իսկ տարածքը հաառակորդ կողմից տեսանելի է: Աշխատանքային վարկած է մշակվել, որ գյուղացուն նկատել են եւ առեւանգել»,- ասաց նա:
Ինչ վերաբերվում է մահվան հանգամանքներին, Սոնա Տռուզյանը նշեց, որ այդ մասին դեռ վաղ է հստակ եզրակացություն տալը. «Սակայն դատելով տեսանյութերից՝ կարող ենք արձանագրել, որ նրա նկատմամբ բռնություն է գործադրվել, ընթացքում հագուստն է փոխվել: Բոլոր տեսանյութերը ուսումնասիրվում են եւ նշանակվել են փորձաքննություններ: Եթե բնական մահով է մահացել, Ադրբեջանը պետք է շահագրգռված լինի, որ օր առաջ դիակը վերադարձնեն»:
Նշենք, որ Տավուշի մարզի Չինարի գյուղի բնակիչ, 32-ամյա Կարեն Պետրոսյանին գերեւարել են օգոստոսի 7-ին, իսկ մեկ օր անց էլ ադրբեջանական կողմը տեղեկատվություն էր տարածել, որ հայ երիտասարդը «հանկարծակի» մահացել է «սուր սրտանոթային անբավարարությունից»:
