Լուգանսկից ոչ հեռու գտնվող Խրյաշեվատոյե գյուղի շրջակայքում փախստականների շարասյան գնդակոծման վայրում 15 մարմին է գտնվել, հայտնել է Ուկրաինայի ազգային անվտանգության եւ պաշտպանության խորհրդի մամուլի քարտուղար Անդրեյ Լիսենկոն:
«Հաջողվել է հայտնաբերել 15 մարմին: Որոնումները շարունակվել են ողջ գիշեր եւ նաեւ այսօր», - ասել է Լիսենկոն եւ հավելել, որ որոնումները շարունակվում են:
Ուկրաինայի իշխանությունները ենթադրել են, որ Լուգանսկում շարասյանը գնդակոծել են «Գրադ» համակարգից:
Ուկրաինական բանակը միջադեպի համար մեղադրել է ռուսամետ ակտիվիստներին, որոնք իրենց հերթին իշխանությունների մեղադրանքը անվանել են «պրոպագանդա»՝ հայտարարելով, որ նման հարվածի համար մարտական հնարավորություններ չունեն:
ԱՄՆ-ի Պետդեպը օգոստոսի 18-ի երեկոյան դատապարտել էր փախստականների շարասյան գնդակոծումը՝ նշելով, որ Վաշինգտոնում տվյալներ չունեն, թե հատկապես ով է կանգնած հարձակման թիկունքում, հայտնում է BBC-ի ռուսական ծառայությունը: