Վրաստանի պաշտպանության նախարար Իրակլի Ալասանիան Ադրբեջան այցի շրջանակում հանդիպել է իր գործընկեր, գեներալ-գնդապետ Զաքիր Հասանովի հետ, հայտնում է «Նովոստի Գռուզիան»՝ վկայակոչելով Վրաստանի պաշտպանության նախարարության մամուլի ծառայությունը:
Նախիջեւանում կայացած հանդիպմանը կողմերը նշել են, որ հարեւան երկրների հարաբերությունները ավելի են խորանում: Հանդիպումից առաջ կայացել է նաեւ Վրաստանի պաշտպանության նախարարին դիմավորելու հանդիսավոր արարողությունը:
«Պաշտպանության նախարարները հանդիպմանը քննարկել են պաշտպանության բնագավառում երկու երկրների միջեւ համագործակցության հեռանկարները: Նրանք նաեւ քննարկել են տարածաշրջանային անվտանգության հարցեր: Կողմերը նշել են, որ հարեւան երկրների միջեւ հարաբերությունները էլ ավելի կխորանան», - հայտնում է մամուլի ծառայությունը՝ նշելով, որ Վրաստանի պաշտպանության նախարարը շնորհակալություն է հայտնել ադրբեջանցի գործընկերոջը Ադրբեջան հրավիրելու համար:
Օգոստոսի 19-ին Վրաստանի ՊՆ նախարարի Նախիջեւան պաշտոնական այցի շրջանակում ծրագրված է Վրաստանի, Ադրբեջանի եւ Թուրքիայի պաշտպանության նախարարների եռակողմ հանդիպում: Իրակլի Ալասանիան, Զաքիր Հասանովը եւ Իսմեթ Յըլմազը կքննարկեն պաշտպանության բնագավառում տարածաշրջանային համագործակցության հեռանկարները:
Հատուկ ուշադրություն է դարձվելու տարածաշրջանի էներգատրանսպորտային ենթակառուցվածքի պաշտպանությանը, որը ռազմավարական նշանակություն ունի, ասվում է հաղորդագրությունում:
