Թուրքիայի Դիարբեքիր նահանգի Լիջեյի շրջանում PKK-ի (Քուրդիստանի բանվորական կուսակցություն) զոհված զինյալ Մահսում Քորքմազի հուշարձանը տեղադրելուց հետո դատախազությունը քրեական գործ է հարուցել, որից հետո զինվորականները հանել են հուշարձանը՝ բռնություն կիրառելով հուշարձանի քանդմանը դեմ դուրս եկած քաղաքացիների դեմ։
Թուրքական Hurriyet-ի փոխանցմամբ՝ օգոստոսի 19-ի առավոտյան ժանդարմերիայի հրամանատարության զինվորները հանել են Լիջեյի շրջանում գտնվող PKK-ի զինյալների գերեզմանոցի տարածքում տեղադրած PKK-ի առաջին հրամանատար Մահսում Քորքմազի հուշարձանը, ով ըստ պնդումների ազգությամբ հայ է եղել։
Հուշարձանի հանելու մասին լսած Լիջեյի բնակիչները շտապել են գերեզմանները եւ փորձել բողոքել դրա դեմ, սակայն զինվորականները բռնություն են գործադրել ու կրակել ցուցարարների ուղղությամբ, ինչի հետեւանքով սպանվել է ցուցարարներից մեկը։
Նշենք, որ Մահսում Քորքմազը սպանվել է 1986 թվականի մարտի 28-ին, թուրքական զորքերի հետ բախումների ժամանակ։